அமெரிக்கா மீதான எதிர்காலத் தாக்குதல்கள் – மீண்டும் கிரீன்லாந்துக்கு குறிவைக்கும் ட்ரம்ப்

அமெரிக்கா மற்றும் ஐரோப்பாவின் பாதுகாப்பைப் பொறுத்தவரை கிரீன்லாந்து “ஈடு இணையற்றது” என்று அமெரிக்க அதிபர் டொனால்ட் ட்ரம்ப் இன்று மீண்டும் வலியுறுத்தியுள்ளார்.

அமெரிக்கா மீதான எதிர்காலத் தாக்குதல்கள் அனைத்தும் இந்த ஆர்க்டிக் தீவின் வழியாகவே வரக்கூடும் என்றும் அவர் கூறினார்.

இது தொடர்பில் தனது உண்மைத் தளத்தில் கருத்து வெளியிட்டுள்ள அவர், “அமெரிக்கா மற்றும் ஐரோப்பாவின் தற்காப்பு மற்றும் தாக்குதல் நடவடிக்கைகளுக்கான பாதுகாப்பு நோக்கத்தின் அடிப்படையில், கிரீன்லாந்து ஈடு இணையற்றது.

அமெரிக்கா மீதான எதிர்காலத் தாக்குதல்கள் கிரீன்லாந்து வழியாகவே வரக்கூடும், “அங்குள்ள நமது பாதுகாப்பு அமைப்பு ட்ரோன்கள், ஏவுகணைகள் அல்லது இன்னும் கற்பனை கூட செய்து பார்க்கப்படாத பிற ஆயுதங்களை வழக்கமாகவே இடைமறித்து அழிக்கும்,” என்று  கூறியுள்ளார்.

அத்துடன் கிரீன்லாந்தில் எண்ணெய், எரிவாயு மற்றும் கனிம வளங்களுக்கான தேடல் பணிகள் தொடங்கப்படவுள்ளதாகவும் ட்ரம்ப் தெரிவித்தார்.

கோபன்ஹேகனின் கட்டுப்பாட்டில் உள்ள, மூலோபாய முக்கியத்துவம் வாய்ந்த ஆர்க்டிக் வட்டப் பகுதியான கிரீன்லாந்தை வலுக்கட்டாயமாகக் கைப்பற்றுவதாக டிரம்ப் மிரட்டியதைத் தொடர்ந்து, வொஷிங்டன் கிரீன்லாந்து மற்றும் டென்மார்க் தலைவர்களுடன் ஒரு பாதுகாப்பு ஒப்பந்தத்தில் கையெழுத்திட்டது.

ரஷ்யா மற்றும் அமெரிக்காவுக்கு இடையிலான ஏவுகணைப் பாதைகளில் மிகக் குறுகிய பாதையில் அமைந்துள்ள கிரீன்லாந்து, ட்ரம்ப் விரும்பும் “கோல்டன் டோம்” (Golden Dome) பாதுகாப்பு கவசத்திற்கு மிகவும் முக்கியமான ஒரு மூலோபாய இடமாக விளங்குகிறது.

அங்கு இதுவரை பயன்படுத்தப்படாத அரிய வகை கனிம வளங்கள் (rare earth deposits) உள்ளன; மேலும் துருவப் பனி உருகுவதால் புதிய கப்பல் போக்குவரத்துப் பாதைகள் திறக்கப்படும் நிலையில், கிரீன்லாந்து ஒரு முக்கிய பங்காற்றக்கூடும்.