ஐ.நா. கூட்டத்தொடரில் விஜித ஹேரத் பங்கேற்பு: 28 ஆம் திகதி உரை

ஐ.நா. பொதுச்சபைக் கூட்டத்தொடரில் பங்கேற்பதற்காக இலங்கை வெளிவிவகார அமைச்சர் விஜித ஹேரத் செப்டம்பர் 26 ஆம் திகதி நியூயோர்க் செல்கின்றார்.

செப்டம்பர் 28 ஆம் திகதி ஐ.நா. கூட்டத்தொடரில் இலங்கையை பிரதிநிதித்துவப்படுத்தி அவர் உரையாற்றவுள்ளார்.

ஐ.நா பொதுச்சபையின் 81 ஆவது அமர்வு செப்டம்பர் 8 ஆம் திகதி தொடங்கியது. இதன் உயர்மட்ட வாரம் மற்றும் பொது விவாதம் செப்டம்பர் 22 முதல் 28 வரை நியூயோர்க்கில் நடைபெறுகின்றது.

செப்டம்பர் 28 ஆம் திகதி நிகழ்த்தப்படவுள்ள அமைச்சர் விஜித ஹேரத்தின் உரை, சர்வதேச முக்கியத்துவம் வாய்ந்த விடயங்களில் இலங்கையின் நிலைப்பாட்டை முன்வைப்பதற்கும்,

உலகளாவிய அரங்கில் நாட்டின் வெளியுறவுக் கொள்கை முன்னுரிமைகளை வெளிப்படுத்துவதற்கும் ஒரு நல்ல வாய்ப்பாக அமையும் என அரசியல் நிபுணர்கள் சுட்டிக்காட்டியுள்ளனர்.

இரு தரப்பு சந்திப்புகளிலும் வெளிவிவகார அமைச்சர் விஜித ஹேரத் பங்கேற்கவுள்ளார்.

குறிப்பாக சவூதி வெளிவிவகார அமைச்சருடனான சந்திப்பின்போது அனோஜன் சிவராசா விடயம் சம்பந்தமாக பேசப்படும் என எதிர்பார்க்கப்படுகின்றது.

கடந்த 2025 ஆம் ஆண்டு நடைபெற்ற 80 ஆவது ஐ.நா பொதுச்சபைக் கூட்டத்தொடரில் ஜனாதிபதி அநுர குமார திஸாநாயக்க பங்கேற்று உரையாற்றியிருந்த நிலையில், இந்த ஆண்டு உயர்மட்ட வாரத்தில் வெளிவிவகார அமைச்சர் என்ற ரீதியில் விஜித ஹேரத் இலங்கையை பிரதிநிதித்துவப்படுத்துகின்றார்.