அணுசக்தி ஒப்பந்தம் இல்லாமலேயே போரை முடிவுக்கு கொண்டுவர தயாராகும் ட்ரம்ப்

ஹோர்முஸ் ஜலசந்தியை மீண்டும் திறக்க தெஹ்ரான் ஒப்புக்கொண்டால், அணுசக்தி ஒப்பந்தம் இல்லாமலேயே ஈரான் போரை முடிவுக்குக் கொண்டுவர டொனால்ட் ட்ரம்ப் தயாராக இருக்கலாம் என சர்வதேச ஊடகங்கள் செய்தி வெளியிட்டுள்ளன.

ஹோர்முஸில் உள்ள மூலோபாய சரக்குப் பாதையில் கப்பல் போக்குவரத்து முழுமையாக மீட்டெடுக்கப்பட்டால், ஈரான் போரிலிருந்து வெளியேறி வெற்றியை அறிவிக்க அமெரிக்க ஜனாதிபதி தயாராகி வருவதாக, அமெரிக்க அதிகாரிகளை மேற்கோள் காட்டி வால் ஸ்ட்ரீட் ஜர்னல் செய்தி வெளியிட்டுள்ளது.

இதற்கிடையே தெஹ்ரான் “எந்த விலை கொடுத்தாவது” ஹோர்முஸ் ஜலசந்தியிலிருந்து பின்வாங்காது என்று ஈரானின் முன்னாள் தலைமை நீதிபதி அயதுல்லா அமோலி லாரிஜானி கூறியதாக, அரசு ஒளிபரப்பு நிறுவனமான IRIB-ஐ மேற்கோள் காட்டி அல் ஜசீரா செய்தி வெளியிட்டுள்ளது.

ஹோர்முஸ் நீர்வழிப்பாதை மீதான ஒப்பந்தம் ஓமானுடன் கிட்டத்தட்ட உறுதியாகிவிட்டது, ஆனால் நீர்வழிப்பாதையைத் திறக்க அது போதுமானதாக இருக்காது என ஈரான் கூறுகிறது.

ஈரானின் உயர்மட்ட தேசியப் பாதுகாப்பு அமைப்பின் செயலாளர் முகமது பாகர் சுல்காதர் (Mohammad Baqer Zolqad) , ஈரானுக்கு எதிரான அமெரிக்க அச்சுறுத்தல்களை முடிவுக்குக் கொண்டுவருவது, ஈரான் மற்றும் அதன் லெபனான், பாலஸ்தீன, யேமன் மற்றும் ஈராக் நட்பு நாடுகளுக்கு எதிரான ஆக்கிரமிப்பை நிறுத்துவது, ஈரான் மீதான முற்றுகை மற்றும் தடைகளை நீக்குவது, ஈரானிய சொத்துக்களை விடுவிப்பது உள்ளிட்ட பிற கோரிக்கைகளையும் பட்டியலிட்டுள்ளார்.

இரு நாடுகளும் இருவேறு பாதையில் பயணிக்கின்றன. ஆகவே தற்போதைக்கு போர் முடிவுறுவதற்கான சாத்தியக்கூறுகள் இல்லை என்பதே நிதர்சனமாகும்.