குடிவரவுத்துறை அதிகாரிகளுக்கு தானியங்கி கேமரா: பரிந்துரையை ஏற்க டிரம்ப் நிர்வாகம் மறுப்பு

அமெரிக்க குடிவரவுத் துறை அதிகாரிகள் தங்களின் ஆயுதங்களை எடுக்கும்போதோ அல்லது காரின் எச்சரிக்கைச் சத்தத்தை (siren) எழுப்பும்போதோ, அவர்களது உடலில் பொருத்தப்பட்டுள்ள கேமராக்கள் (body-worn cameras) தானாகவே இயங்கும் வகையிலான தொழில்நுட்பத்தை பயன்படுத்த வேண்டும் என்ற அரசாங்கக் கண்காணிப்புக் குழுவின் பரிந்துரையை டிரம்ப் நிர்வாகம் நிராகரித்துள்ளது.

அரசாங்கப் பொறுப்புக்கூறல் அலுவலகம் (GAO) வெளியிட்ட அறிக்கையில் குறிப்பிடப்பட்டிருந்த பல பரிந்துரைகளில், இந்த தானியங்கி கேமரா செயல்பாடும் ஒன்றாகும்.

அமெரிக்காவில் சட்டவிரோதக் குடிவரவுக்கு எதிரான நடவடிக்கைகளின்போது, மினியாபோலிஸ் நகரில் இரண்டு அமெரிக்கக் குடிமக்கள் சுட்டுக் கொல்லப்பட்ட சம்பவத்தைத் தொடர்ந்து, அதிகாரிகளின் செயல்பாடுகள் குறித்து கடும் விமர்சனங்களும் கேள்விகளும் எழுந்துள்ள நிலையில் இந்தப் பரிந்துரை வெளியாகியுள்ளது.

அமெரிக்கக் குடிவரவு மற்றும் சுங்க அமுலாக்கப் பிரிவு (ICE) மற்றும் எல்லைப் பாதுகாப்புப் பிரிவு (CBP) ஆகிய அமைப்புகள் தங்கள் கேமரா திட்ட மேலாண்மையை மேம்படுத்த வேண்டும் என்று தெரிவித்துள்ள GAO அறிக்கை, இந்த அமைப்புகள் முறையே 2024 மற்றும் 2022-ஆம் ஆண்டிற்குப் பிறகு தங்களது திட்டங்களை புதுப்பிக்கவில்லை என்றும் சுட்டிக்காட்டியுள்ளது.

பிப்ரவரி 2025 முதல் செப்டம்பர் வரையிலான காலக்கட்டத்தை உள்ளடக்கிய இந்த அறிக்கையில், கேமராக்கள் கட்டாயம் இயங்குவதை உறுதிசெய்யக் கூடுதல் கட்டுப்பாடுகளை ICE அமல்படுத்த வேண்டும் எனப் பரிந்துரைக்கப்பட்டுள்ளது.

“தானியங்கி கேமரா இயக்கம் போன்ற கூடுதல் கட்டுப்பாடுகள், வெளிப்படைத்தன்மை, பொறுப்புக்கூறல் மற்றும் பொதுமக்களின் நம்பிக்கையைத் தக்கவைப்பதில் கூடுதல் உறுதியை அளிக்கும்,” என்று GAO தெரிவித்துள்ளது.

இருப்பினும், இதன் தாய் அமைப்பான உள்நாட்டுப் பாதுகாப்புத் துறை (DHS), தனியுரிமை மற்றும் செயல்பாட்டு ரீதியிலான ஆபத்துகளைச் சுட்டிக்காட்டி இந்தப் பரிந்துரையை ஏற்க மறுத்துவிட்டது.