மீண்டும் வெற்றிப் பாதைக்கு திரும்பினார் ஒலிம்பிக் நாயகன் கிப்சோஜ்

இரண்டு முறை ஒலிம்பிக் சாம்பியனான கென்யாவின் புகழ்பெற்ற ஓட்டப்பந்தய வீரர் எலியுட் கிப்சோஜ், Eliud Kipchoge ஆஸ்திரேலியாவின் மெல்போர்ன் நகரில் நடைபெற்ற மாரத்தான் போட்டியில் அபார வெற்றி பெற்றார். இதன்மூலம் கடந்த 3 ஆண்டுகளில் தனது முதல் மாரத்தான் வெற்றியை அவர் பதிவு செய்துள்ளார்.

வரலாற்றின் மிகச்சிறந்த மாரத்தான் வீரரான 41 வயதான கிப்சோஜ், ஞாயிற்றுக்கிழமை நடைபெற்ற இப்போட்டியில் 2 மணி நேரம், 9 நிமிடங்கள், 10 விநாடிகளில் இலக்கை எட்டினார். இது இப்போட்டியின் முந்தைய சாதனையை விட 2 விநாடிகள் குறைவாகும்.

2023-ல் பெர்லினில் வெற்றி பெற்றதற்குப் பிறகு, மாரத்தான் பிரிவில் அவருக்குக் கிடைத்த முதல் வெற்றி இதுவாகும். தான் நம்பும் நல்ல நோக்கங்களுக்காக நிதி திரட்டுவதற்காக அவர் மேற்கொண்டுள்ள “உலகப் பயணம்” (World Tour) திட்டத்தின் ஒரு பகுதியாக இப்போட்டியில் பங்கேற்றார்.

அண்டார்டிகா உட்பட உலகின் 7 கண்டங்களிலும் இரண்டு ஆண்டுகளில் மாரத்தான் போட்டிகளை நிறைவு செய்யத் திட்டமிட்டுள்ளதாக முன்னாள் உலக சாதனையாளரான கிப்சோஜ், 2025-ல் அறிவித்திருந்தார். தென்னாப்பிரிக்கா மற்றும் பிரேசிலைத் தொடர்ந்து அவரது இந்தப் பயணத்தில் மெல்போர்ன் மூன்றாவது இடமாகும்.

இப்போட்டியில் ஆஸ்திரேலியாவின் தாமஸ் டோ கான்டோ 2:10:35 நேரத்தில் வந்து இரண்டாம் இடத்தையும், அதே நாட்டைச் சேர்ந்த ரீஸ் எட்வர்ட்ஸ் 2:14:33 நேரத்தில் வந்து மூன்றாம் இடத்தையும் பிடித்தனர்.

பெண்கள் பிரிவில், நியூசிலாந்தின் கமீல் பிரெஞ்ச் 2:28:25 நேரத்தில் இலக்கை எட்டி முதலிடம் பிடித்தார். ஆஸ்திரேலியாவின் சினேட் டைவர் (2:28:49) இரண்டாமிடமும், அயர்லாந்தின் நிகோலா ஷெரிடான் (2:29:13) மூன்றாமிடமும் பிடித்தனர்.