ஒடிசாவில் கனமழை – கஜபதியில் இருந்து 1500 பேர் வெளியேற்றம்

வங்காள விரிகுடாவில் நிலவிய ஆழ்ந்த காற்றழுத்த தாழ்வு மண்டலம் நேற்று நள்ளிரவு கரையை கடந்துள்ளது.

இதனால் ஒடிசா மற்றும் ஆந்திரப் பிரதேசத்தில் பலத்த காற்றும் கனமழையும் பதிவாகியுள்ளதாக இந்திய ஊடகங்கள் செய்தி வெளியிட்டுள்ளன.

இந்த வானிலை அமைப்பு மேலும் வடமேற்கு திசையில் நிலப்பகுதியை நோக்கி நகரும் என்றும், நாளைய தினம் வலுவிழக்கும் எனவும் இந்திய வானிலை ஆய்வு மையம் (IMD) தெரிவித்துள்ளது.

சூழ்நிலையை ஆய்வு செய்த ஆந்திர முதல்வர் என். சந்திரபாபு நாயுடு, மோசமான வானிலை காரணமாக மாவட்ட ஆட்சியர்கள் மற்றும் அதிகாரிகளை விழிப்புடன் இருக்குமாறும் எச்சரித்துள்ளார்.

அத்துடன் எதிர்பாராத வெள்ளம் மற்றும் கனமழைக்கு வாய்ப்புள்ள பகுதிகளில் வசிக்கும் மக்களுக்குத் தகவல் தெரிவிக்கப்படுவதை உறுதி செய்யுமாறும் அறிவுறுத்தினார்.

இதேவேளை புயல் கரையை கடந்த நிலையில், ஒடிசா மாநிலத்தின் கஜபதி பகுதியிலிருந்து சுமார் 1,500 குடியிருப்பாளர்கள் வெளியேற்றப்பட்டுள்ளதாக அம்மாநில அமைச்சர் சுரேஷ் பூஜாரி தெரிவித்துள்ளார்.

மாவட்ட நிர்வாகம் மிகுந்த விழிப்புடன் இருக்குமாறும், வெள்ள நீரில் யாரும் சிக்கிக்கொள்ளாமல் இருப்பதை உறுதி செய்யுமாறும் மாநில அரசு அறிவுறுத்தியுள்ளது.