உலகெங்கிலும் உள்ள திருமணமாகாதவர்களுக்கு இலவச விசா வழங்கும் பின்லாந்து

பின்லாந்து அரசாங்கம் திருமணமாகாதவர்களுக்கு இலவச பயண அழைப்பை விடுத்துள்ளது.

துணையைக் கண்டறியவும், நாட்டின் உணவுப் பண்பாட்டை அனுபவிக்கவும் இந்த அழைப்பு விடுக்கப்பட்டுள்ளது.

இதற்கமைய “பின்னிஷ் டின்னர் டேட்” “Finnish Dinner Date”  என்ற சிறப்பு திட்டத்தை அந்நாட்டு அரசாங்கம் அறிமுகப்படுத்தியுள்ளது.

உலகின் மகிழ்ச்சியான நாடான பின்லாந்தின் சுற்றுலா வாரியம், உலகெங்கிலும் உள்ள திருமணமாகாதவர்களுக்கு மறக்க முடியாத அனுபவத்தை வழங்கும் நோக்கில் இந்த திட்டத்தை அறிமுகப்படுத்தியுள்ளது.

இந்தத் திட்டத்தின் கீழ், உலகெங்கிலும் உள்ள 16 திருமணமாகாத நபர்கள் பின்லாந்திற்கு முற்றிலும் இலவசமாக அழைக்கப்படுவார்கள் (விமானப் பயணம், தங்குமிடம், உணவு மற்றும் செயல்பாடுகள் உட்பட அனைத்து செலவுகளும் ஏற்கப்படும்).

இந்தச் சிறப்புப் பயணம் பிப்ரவரி 09 முதல் 19, 2027 வரை நடைபெறத் திட்டமிடப்பட்டுள்ளது.

தலைநகர் ஹெல்சிங்கி (Helsinki)  மற்றும் டம்பேரேயில் (Tampere) நடைபெறும் ஒரு சிறப்பு இரவு விருந்துதான் இதன் முக்கிய நிகழ்வாகும்.

சர்வதேசப் பங்கேற்பாளர்கள் பின்லாந்தைச் சேர்ந்த உள்ளூர் திருமணமாகாதவர்களைச் சந்திப்பார்கள்.

எவ்வாறு பங்கேற்பது மற்றும் விதிகள் என்ன?

ஃபின்லாந்தில் வசிக்காத, உலகின் எந்தப் பகுதியிலிருந்தும் 18 வயதுக்கு மேற்பட்ட திருமணமாகாத நபர்கள் தனித்தனியாக விண்ணப்பிக்கலாம்.

எப்படி விண்ணப்பிப்பது

“ஒரு இரவு உணவு டேட்டிங்கிற்கு நீங்கள் என்ன பரிமாறுவீர்கள், ஏன்?” என்ற கேள்விக்கு பதிலளிக்கும் வகையில் ஆங்கிலத்தில் ஒரு குறுகிய வீடியோவை உருவாக்கவும்.

#FinnishDinnerDate என்ற ஹேஷ்டேக்கைப் பயன்படுத்தி, விசிட்ஃபின்லாந்தை (VisitFinland) டேக் செய்து, டிக்டாக், இன்ஸ்டாகிராம் அல்லது யூடியூப் போன்ற பிரபலமான சமூக ஊடகக் கணக்கில் அந்த வீடியோவைப் பதிவிடவும்.

பின்னர், விசிட்ஃபின்லாந்தின் அதிகாரப்பூர்வ இணையதளத்தில் உள்ள ஆன்லைன் விண்ணப்பப் படிவத்தை நிரப்பி, உங்கள் வீடியோவின் இணைப்பையும் அதில் சேர்க்கவும்.

விண்ணப்பங்களுக்கான கடைசி திகதி 10 நவம்பர் 2026 , ஃபின்லாந்து நேரப்படி காலை 11:59 மணி ஆகும்.

16 அதிர்ஷ்ட வெற்றியாளர்களின் பெயர்கள், 2026 டிசம்பர் 1 அன்று விசிட் ஃபின்லாந்தின் அதிகாரப்பூர்வ சமூக ஊடக சேனல்களில் அறிவிக்கப்படும்.

ஃபின்லாந்து சுற்றுலா அதிகாரிகளின் கூற்றுப்படி, இந்தப் பயணத்தின் மூலம், பங்கேற்பாளர்கள் ஃபின்லாந்து உணவுப் பண்பாட்டின் மீதான அன்பையும், அதன் சுவையையும், ஒரு மறக்க முடியாத பயண அனுபவத்தையும் பெறுவார்கள்.