ஐரோப்பிய ஒன்றிய உச்சி மாநாடு ஆரம்பம்: சீன ஏற்றுமதி, எரிசக்தி விலை உயர்வு குறித்து விவாதம்

சீனாவிலிருந்து அதிகரித்துவரும் ஏற்றுமதிகளைக் கட்டுப்படுத்துதல், அதிகளவில் உயர்ந்துள்ள எரிசக்தி விலைகளைக் குறைத்தல் மற்றும் எதிர்கால ஐரோப்பிய ஒன்றிய வரவுசெலவுத் திட்டம் தொடர்பான வேறுபாடுகளைக் களைதல் உள்ளிட்ட முக்கியப் பிரச்சினைகள் குறித்து விவாதிப்பதற்காக, ஐரோப்பிய ஒன்றியத் தலைவர்கள் பங்கேற்கும் உச்சி மாநாடு வியாழக்கிழமை தொடங்கியது.

சீனாவிலிருந்து இறக்குமதி செய்யப்படும் Hybrid ரக கார்களின் எண்ணிக்கையை கட்டுப்படுத்துவதற்காக ஐரோப்பிய ஆணையம் பெய்ஜிங்குடன் ஒப்பந்தம் செய்து கொண்ட சில நாட்களிலேயே, ஐரோப்பிய ஒன்றியத்தின் 27 நாடுகளின் தலைவர்களும் இந்த உச்சிமாநாட்டில் சந்தித்துப் பேசி வருகின்றனர்.

சீனாவுடனான சரக்கு வர்த்தகப் பற்றாக்குறையைக் குறைக்கும் நோக்கில் ஐரோப்பிய ஒன்றியம் எடுத்துள்ள பரந்த முயற்சியின் முதல் படியாக இந்த ஒப்பந்தம் பார்க்கப்படுகிறது.

சீனாவுடனான வர்த்தகப் பற்றாக்குறை 2025-இல் 360 பில்லியன் யூரோக்களைத் (€360 billion) தொட்ட நிலையில், நடப்பு ஆண்டில் அந்த அளவை விட அதிகரிக்கும் என எதிர்பார்க்கப்படுகிறது.

உச்சிமாநாட்டின் வரைவு அறிக்கையின்படி, பெய்ஜிங்குடன் பேச்சுவார்த்தைகளைத் தொடருமாறு ஆணையத்தைக் கேட்டுக்கொள்ளத் தலைவர்கள் விரும்புவதுடன், ஐரோப்பிய ஒன்றியத்தைப் பாதுகாப்பதற்காக அதன் வர்த்தகத் தற்காப்பு நடவடிக்கைகளை முழுமையாகப் பயன்படுத்தவும், புதிய வர்த்தக வழிமுறைகளைச் சேர்க்கவும் திட்டமிட்டுள்ளனர்.

“இந்த வர்த்தகச் சமநிலையின்மை ஒரு குறிப்பிட்ட துறையோடு மட்டும் நிற்கவில்லை. ஒவ்வொரு மாதமும் ஆயிரக்கணக்கான வேலைவாய்ப்புகள் பறிபோவதால், நமக்கு அதிக அவகாசம் இல்லை” என்று ஐரோப்பிய ஒன்றியத்தின் மூத்த தூதரக அதிகாரி ஒருவர் தெரிவித்துள்ளார்.

சீன இறக்குமதியில் ஜெர்மனியின் அதிரடி நிலைப்பாடு

கடந்த வாரம் பிரான்ஸ் மற்றும் ஜெர்மனி வெளியிட்ட கூட்டறிக்கையே இந்த விவாதத்தின் முக்கியப் புள்ளியாக இருக்கும் என எதிர்பார்க்கப்படுகிறது. வேதிப்பொருட்கள் (Chemicals) மற்றும் ‘PET’ பிளாஸ்டிக் இறக்குமதியைக் கையாள உடனடி நடவடிக்கைகள் தேவை என்றும், ஐரோப்பிய ஒன்றியத்தைப் பாதிக்கும் நாடுகளுக்கு எதிராக விரைவாகப் பதிலடி கொடுக்கும் நடவடிக்கைகளை எடுக்க வேண்டும் என்றும் இந்த இரு பெரும் பொருளாதார நாடுகளும் கோரியுள்ளன.

இரண்டு ஆண்டுகளுக்கு முன்பு வரை சீன மின்சார வாகனங்கள் மீதான ஐரோப்பிய ஒன்றியத்தின் மானிய எதிர்ப்பு வரிகளை கடுமையாக விமர்சித்து வந்த ஜெர்மனி, தற்போது இத்தகைய கடுமையான நிலைப்பாட்டை எடுத்திருப்பது ஒரு முக்கிய மாற்றமாகக் கருதப்படுகிறது.

எதிர்கால வரவுசெலவுத் திட்டம் மற்றும் உக்ரைன் விவகாரம்

ஐரோப்பிய ஒன்றியத்தின் அடுத்த ஏழு ஆண்டுகளுக்கான (2028-2034) வரவுசெலவுத் திட்டம் குறித்தும் தலைவர்கள் விவாதிக்க உள்ளனர். இதற்கு அனைத்து நாடுகளின் ஒருமனதான ஒப்புதல் தேவை என்பதால், இதற்காக வரும் நவம்பர் மாத இறுதியில் சிறப்பு உச்சிமாநாடு நடத்தப்படவுள்ளது.

வெள்ளிக்கிழமை நடைபெறவுள்ள முக்கிய விவாதத்தில் உக்ரைனின் ஜனாதிபதி வோலோடிமிர் செலென்ஸ்கி கலந்துகொள்ளவுள்ள நிலையில், உக்ரைனின் 2027-ஆம் ஆண்டிற்கான நிதித் தேவைகள் குறித்துப் பேசப்படும் என எதிர்பார்க்கப்படுகிறது. மேலும், ரஷ்ய டீசல் மீதான தடைகளை அமெரிக்கா தற்காலிகமாக நீக்கியதற்கு ஐரோப்பிய தலைவர்கள் தங்களது கவலையைத் தெரிவிக்க வாய்ப்புள்ளது.