பயங்கரவாதத்திலிருந்து அரசை பாதுகாக்கும் சட்டத்தின் நோக்கம் என்ன?

“பயங்கரவாதத்திலிருந்து அரசைப் பாதுகாக்கும் சட்டத்தை ஜனநாயகத்திற்கு விரோதமான முறையில் பயன்படுத்த மாட்டோம். அச்சட்டத்தின் ஊடாக மக்களின் உரிமைகளைப் பறிக்கும் எண்ணம் எதுவும் இல்லை” என்று அமைச்சரவைப் பேச்சாளரும் அமைச்சருமான நளிந்த ஜயதிஸ்ஸ தெரிவித்தார்.

அமைச்சரவை முடிவுகளை அறிவிக்கும் வாராந்த ஊடகவியலாளர் சந்திப்பு அரசாங்க தகவல் திணைக்களத்தில் நேற்று நடைபெற்றது.

இதன்போது, பயங்கரவாதத்திலிருந்து அரசைப் பாதுகாக்கும் சட்டமூலம் தொடர்பில் எழுப்பப்பட்ட கேள்விகளுக்குப் பதிலளிக்கையிலேயே அமைச்சர் இவ்வாறு கூறினார்.

இது தொடர்பில் அவர் மேலும் கூறியவை வருமாறு,

“பயங்கரவாதத் தடைச்சட்டம் நீக்கப்படும் என நாம் உறுதியளித்தோம். அதனைச் செய்வதற்குரிய நடவடிக்கைகள் இடம்பெற்று வருகின்றன. அதேபோல, பயங்கரவாதத்திலிருந்து அரசைப் பாதுகாப்பதற்குரிய சட்ட ஏற்பாடுகளும் அவசியமாகும். அதற்கேற்ற வகையிலேயே புதிய சட்டம் இயற்றப்படுகின்றது.

பயங்கரவாதி என முத்திரைகுத்தி சாதாரண மக்களை ஒடுக்கும் திட்டம் எம்மிடம் இல்லை. மக்களின் உரிமைகள் மற்றும் ஜனநாயக உரிமைகளை முடக்கும் எவ்வித நோக்கமும் எமக்குக் கிடையாது. எனவே, பயங்கரவாதத்திலிருந்து அரசைப் பாதுகாக்கும் புதிய சட்ட ஏற்பாடு குறித்து வீண் அச்சம் கொள்ளத் தேவையில்லை.

ஜனநாயகம், மனித உரிமை, நாட்டின் பாதுகாப்பு என அனைத்து விடயங்களையும் கருத்திற்கொண்டே இதற்கான நடவடிக்கைகள் எடுக்கப்பட்டுள்ளன. பாதாளக் குழுக்களை ஒடுக்குவதற்குரிய சட்டமூலமும் தயாரிக்கப்பட்டு வருகின்றது” – என்றார் நளிந்த ஜயதிஸ்ஸ.