சிறையில் அனோஜன் தாக்கப்பட்டாரா? உண்மைகளை வெளிப்படுத்தினார் ஹேரத்

சவூதி அரேபியாவில் மரண தண்டனையை எதிர்கொண்டுள்ள இலங்கை பிரஜை அனோஜன் சிவராசாவிற்கு உதவ இலங்கை அரசாங்கம் தனது சட்ட ரீதியான முயற்சிகளைத் தீவிரப்படுத்தியுள்ளது. அங்குள்ள சட்டக் குழுவினர் அந்நாட்டின் உயர் நீதிமன்றத்தில் மேல்முறையீடு செய்வதற்கான பணிகளை மேற்கொண்டு வருகின்றனர் என்று வெளியுறவு அமைச்சர் விஜித ஹேரத் நாடாளுமன்றத்தில் தெரிவித்துள்ளார்.

மேல்முறையீட்டைச் சமர்ப்பிப்பதற்கான காலக்கெடு அக்டோபர் 17 ஆம் திகதி என்றும், சவூதி சட்ட நிறுவனம் ஒன்றுடன் கலந்தாலோசித்த பின்னர் சட்டக் குழுவினர் அதனை விரைவில் பூர்த்தி செய்து தாக்கல் செய்வார்கள் என்று அரசாங்கம் எதிர்பார்ப்பதாகவும் அவர் மேலும் தெரிவித்தார்.

இலங்கை சட்ட நிபுணர்களும் சவூதி சட்ட ஆலோசகர்களும் இணைந்து இந்த மேல்முறையீட்டுப் பணிகளை மேற்கொண்டு வருவதாகவும், அதேவேளையில் வெளியுறவு அமைச்சகம், ரியாத்தில் உள்ள இலங்கைத் தூதரகம், இலங்கை வெளிநாட்டு வேலைவாய்ப்புப் பணியகம் மற்றும் சட்டமா அதிபர் திணைக்களம் ஆகியவை அனோஜனுக்கு தேவையான சட்ட மற்றும் தூதரக உதவிகளை வழங்குவதற்கான ஒருங்கிணைப்பு நடவடிக்கைகளை மேற்கொண்டு வருவதாகவும் அமைச்சர் குறிப்பிட்டார்.

நீதிமன்ற நடவடிக்கைகள் நிறைவடைந்த பின்னரே அவருக்கு பொதுமன்னிப்பு கோரவோ அல்லது தண்டனைக் காலத்தை குறைக்கவோ இராஜதந்திர முயற்சிகள் மேற்கொள்ளப்படும் எனவும் ஹேரத் விளக்கமளித்துள்ளார்.

வழக்கு உயர் நீதிமன்றத்தில் நிலுவையில் இருக்கும்போது அதில் தலையிடுவதை ஆதரிக்கப்போவதில்லை என்றும், பொது மன்னிப்பு கோரும் எந்தவொரு இராஜதந்திரத் தலையீடும் நீதிமன்ற நடவடிக்கைகள் நிறைவடைந்த பின்னரே இடம்பெற வேண்டும் என்றும் சவூதி அதிகாரிகள் கலந்துரையாடல்களின் போது சுட்டிக்காட்டியதாகவும் அவர் நாடாளுமன்றத்தில் தெரிவித்துள்ளார்.

இதற்கிடையில், சிறையில் சிவராசா அண்மையில் தாக்கப்பட்டதாக வெளியான செய்திகள் குறித்தும் அமைச்சர் விளக்கமளித்தார்.

இச்சம்பவம் குறித்து விசாரிப்பதற்காக இலங்கைத் தூதரக அதிகாரிகள் அக்டோபர் 6 ஆம் திகதி சிறைக்குச் சென்று, சிறைச்சாலைத் தலைவர் மற்றும் சிறை மருத்துவர் ஆகியோரைச் சந்தித்தனர்.

சவூதி சிறைச்சாலை அதிகாரிகள் தூதரகத்திற்கு வழங்கிய தகவலின்படி, அனோஜனும் அவருடன் ஒரே அறையைப் பகிர்ந்துகொண்ட மற்றொரு கைதியும் இடையே ஏற்பட்ட வாக்குவாதம் கைகலப்பாக மாறியுள்ளது.

அனோஜனின் முகத்தில் கீறல்கள் மற்றும் நகங்களால் ஏற்பட்ட காயங்கள் மட்டுமே இருந்ததாகவும், கத்தி, கூர்மையான ஆயுதம் அல்லது வேறு எந்த ஆயுதமும் பயன்படுத்தப்படவில்லை என்றும் சிறைச்சாலை அதிகாரிகளும் மருத்துவரும் இலங்கை அதிகாரிகளிடம் தெரிவித்ததாக ஹேரத் கூறினார்.

இருப்பினும், அந்த விஜயத்தின் போது இலங்கைத் தூதரக அதிகாரிகள் சிவராசாவை நேரில் சந்திக்க அனுமதிக்கப்படவில்லை என்பதையும், அவரது காயங்கள் குறித்த தகவல்கள் சவூதி அதிகாரிகளால் வழங்கப்பட்டவை என்பதையும் அமைச்சர் உறுதிப்படுத்தினார்.

அனோஜனின் உயிருக்கு தற்போது எந்தவித அச்சுறுத்தலும் இல்லை என்றும், அவரது பாதுகாப்பை உறுதி செய்வதற்கான நடவடிக்கைகள் எடுக்கப்பட்டுள்ளதாகவும் சிறைச்சாலை அதிகாரிகள் இலங்கை அதிகாரிகளிடம் உறுதியளித்ததாக ஹேரத் தெரிவித்தார்.

சிவராசா வேறொரு அறைக்கு மாற்றப்பட்டுள்ளார் என்பதும் குறிப்பிடத்தக்கது. சிவராசாவின் குடும்பத்தினர் முன்வைத்த கடுமையான காயங்கள் குறித்த குற்றச்சாட்டுகளுக்குப் பதிலளித்த ஹேரத், உறுதிப்படுத்தப்படாத தகவல்களைப் பரப்புவதைத் தவிர்க்குமாறு கேட்டுக்கொண்டார். அதேவேளையில், அவருக்காகச் சட்ட மற்றும் இராஜதந்திர முயற்சிகளை மேற்கொள்ளும்போது, ​​சவூதி அதிகாரிகளால் அதிகாரப்பூர்வமாக வழங்கப்படும் தகவல்களையே இலங்கை நம்பியிருப்பதாகவும் அவர் வலியுறுத்தினார்.

சிவராசாவுக்குத் தீர்வு பெற்றுக்கொடுப்பதற்காக, சவூதி அரேபியாவின் சட்ட மற்றும் நீதித்துறை கட்டமைப்பிற்குள் சாத்தியமான அனைத்து நடவடிக்கைகளையும் எடுக்க அரசாங்கம் உறுதியுடன் இருப்பதாக அமைச்சர் தெரிவித்தார்.

.