4 வருடங்களுக்கு பிறகு வட்டி விகிதத்தை உயர்த்தியது இந்திய மத்திய வங்கி

அதிகரித்து வரும் பணவீக்கம் மற்றும் வலுவான பொருளாதார வளர்ச்சியை எதிர்கொள்ளும் வகையில், இந்திய மத்திய வங்கி (RBI) புதன்கிழமை தனது முக்கிய வட்டி விகிதமான ‘ரிப்போ விகிதத்தை’ (Repo Rate) 25 அடிப்படைப் புள்ளிகள் உயர்த்தியது.

இதன் மூலம் வட்டி விகிதம் 5.5% ஆக உயர்ந்துள்ளது. இது கிட்டத்தட்ட நான்கு ஆண்டுகளில் மத்திய வங்கி மேற்கொள்ளும் முதல் வட்டி விகித உயர்வாகும்.

தனது பணவியல் கொள்கை நிலையை “நடுநிலை” (neutral) என்ற நிலையிலிருந்து “கணிப்பீட்டு இறுக்கம்” (calibrated tightening) என மாற்றியதன் மூலம், மத்திய வங்கி மேலும் வட்டி விகிதங்களை உயர்த்தக்கூடும் என்ற சமிக்ஞையை வெளிப்படுத்தியுள்ளது.

எனினும், அடுத்தடுத்த உயர்வுகள் மற்றும் அவற்றின் காலநேரம் ஆகியவை பணவீக்கம் மற்றும் பொருளாதார வளர்ச்சியின் தரவுகளைப் பொறுத்தே அமையும் என மத்திய வங்கி ஆளுநர் சஞ்சய் மல்ஹோத்ரா தெரிவித்தார்.

ஈரான் போரினால் உயர்ந்துள்ள கச்சா எண்ணெய் விலை பணவீக்கத்தைத் தூண்டி, மக்களின் வாங்கும் சக்தியைக் குறைத்து, செலாவணிகளின் மதிப்பில் சரிவை ஏற்படுத்தியுள்ளது.

இதனால் உலகெங்கிலும் உள்ள முக்கிய மத்திய வங்கிகள் வட்டி விகிதங்களை உயர்த்தி வரும் வரிசையில் தற்போது இந்தியாவும் இணைந்துள்ளது.

மேலும், ‘எல் நினோ’ (El Niño) காரணத்தால் பொய்த்துப்போன பருவமழை, ஆசியாவின் மூன்றாவது பெரிய பொருளாதார நாடான இந்தியாவில் விலைவாசி அழுத்தத்தை மேலும் அதிகரித்துள்ளது.