நடுவானில் நடந்த பயங்கரம்: துணை விமானி வழங்கிய பகீர் வாக்குமூலம்

Flydubai விமானத்தின் இந்தியக் கேப்டன் சுமித் மச்சாரைத் தாக்கி, நடுவானில் விமானத்தைக் கீழே மோதி அழிக்க முயன்ற ஓமன் நாட்டைச் சேர்ந்த துணை விமானி ஹமாம் அல்-ஹம்மாமி, தான் சாகப் பயப்படவில்லை என்றும் 170-க்கும் மேற்பட்ட பயணிகளுடன் சென்ற அந்த விமானத்தை மோதி அழிப்பதே தனது நோக்கம் என்றும் சவூதி அரேபிய அதிகாரிகளிடம் வாக்குமூலம் அளித்துள்ளார்.

சவூதி அரேபியாவில் விமானம் அவசரமாகத் தரையிறக்கப்பட்டதைத் தொடர்ந்து, முதற்கட்ட விசாரணைக்குப் பின்னர் ஹம்மாமி தற்போது ஐக்கிய அரபு அமீரக (UAE) அதிகாரிகளிடம் ஒப்படைக்கப்பட்டு தீவிர விசாரணைக்கு உட்படுத்தப்பட்டு வருகிறார்.

இச்சம்பவத்தை ஒரு பயங்கரவாத நடவடிக்கை எனக் குறிப்பிட்டுள்ள ஐக்கிய அரபு அமீரகத் தலைமை வழக்கறிஞர், இதில் வெளிநாட்டுச் சக்திகளுக்குப் பங்கு உள்ளதா என்பது குறித்து சவூதி அரேபியா, ஐக்கிய அரபு அமீரகம் மற்றும் இஸ்ரேல் ஆகிய நாடுகளின் உளவு அமைப்புகள் இணைந்து விசாரணை நடத்தி வருவதாகத் தெரிவித்துள்ளார்.

ஓமன் நாட்டைச் சேர்ந்த தந்தைக்கும் சிரியா நாட்டு தாய்க்கும் பிறந்த ஹம்மாமி, சிரிய உள்நாட்டுப் போரின் போது அங்குத் தங்கியிருந்த காலத்தில் தீவிரவாதப் பாதைக்குத் திரும்பினாரா என்ற கோணத்தில் விசாரணை முடுக்கிவிடப்பட்டுள்ளது.

மேலும், அவரது சமூக வலைதளக் கணக்குகளை ஆய்வு செய்ததில், பெண்களுக்கு எதிரான கருத்துகள் மற்றும் தீவிரவாதச் சிந்தனைகள் கொண்ட பல்வேறு பதிவுகளை அவர் பகிர்ந்திருந்தது தெரியவந்துள்ளது.

முன்னதாக ஓமன் ஏர் (Oman Air) நிறுவனத்தில் பணிபுரிந்தபோது, தீவிரவாத இணையதளங்களைப் பார்வையிட்டதற்காக ஹம்மாமி விமானம் இயக்கத் தடை விதிக்கப்பட்டு, தீவிரவாத ஒழிப்புப் பயிற்சிக்கும் உட்படுத்தப்பட்டிருந்தார்.

இருப்பினும், நடப்பு 2026-ஆம் ஆண்டு பிப்ரவரி மாதத்தில் ப்ளைதுபாய் நிறுவனம் இவரைப் பணியில் சேர்த்துள்ளது.

ஓமன் நாட்டின் பாதுகாப்பு எச்சரிக்கைகள் குறித்து ப்ளைதுபாய் நிறுவனம் உரிய பின்னணிப் பரிசோதனைகளை மேற்கொண்டு முறைப்படி விசாரிக்கத் தவறியதே, 170-க்கும் மேற்பட்ட பயணிகளின் உயிரைப் பணயம் வைக்கும் அளவுக்கு நடுவானில் இத்தகைய கொடூரத் தாக்குதல் நடைபெறக் காரணமாக அமைந்தது என்ற கடுமையான குற்றச்சாட்டுகள் எழுந்துள்ளன.