ஞானசார தேரருக்கு மன்னிப்பு வழங்கக்கோரி 3ஆவது நாளாக தொடரும் நடைபவனி

பொதுபல சேனா அமைப்பின் பொதுச்செயலாளர் கலகொடஅத்தே ஞானசார தேரருக்குப் பொது மன்னிப்பு கோரியும், அவருக்குச் சிறைக்கைதிக்கான ஆடை அணிவிக்கப்பட்டமைக்கு எதிர்ப்புத் தெரிவித்தும் மகா சங்கத்தினரால் முன்னெடுக்கப்படும் நடைபயணம் இன்று(12) 3 ஆவது நாளாகவும் தொடர்கின்றது.

‘சுதந்திரத்திற்கான யாத்திரை’ எனும் பெயரிலான இந்த நடைபயணம் நேற்று முன்தினம் கண்டியில் ஆரம்பமாகி, கடுகன்னாவை வரை வந்தடைந்தது. இதில் ஏராளமான பௌத்த பிக்குகள் கலந்துகொண்டனர்.

இதனைத் தொடர்ந்து, 2ஆவது நாளான நேற்று கடுகன்னாவையிலிருந்து கேகாலை வரை நடைபவனி இடம்பெற்றது. இதன்போது சில இடங்களில் பொதுமக்கள் திரண்டு வரவேற்பளித்ததுடன், பிக்குகளுக்குத் தானமும் வழங்கினர்.

3ஆவது நாளான இன்று (12) கேகாலையிலிருந்து வரக்காப்பொலை வரை இந்நடைபயணம் செல்லவுள்ளதுடன், வரும் 15 ஆம் திகதி கொழும்பைச் சென்றடைவதற்குத் திட்டமிடப்பட்டுள்ளது.

அதேவேளை, ஞானசார தேரருக்கு மன்னிப்பு வழங்குமாறுகோரி கையொப்பம் திரட்டும் நடவடிக்கை நேற்று பானதுறையில் இடம்பெற்றது.பின்னர் கொழும்பு கோட்டையிலும் கையெழுத்து திரட்டப்பட்டது.