இந்தியா கூட்டணி தலைவர்கள் பேரணி: மத்திய அமைச்சர் கடும் சீற்றம்

தலைமை தேர்தல் ஆணையர் (CEC) மற்றும் வாக்காளர் பட்டியல் சிறப்பு தீவிரத் திருத்தம் (SIR) விவகாரங்களுக்கு எதிராக ‘இந்தியா’ கூட்டணி கட்சிகள் உச்ச நீதிமன்றத்தை நோக்கிப் பேரணியாகச் சென்றதை மத்திய அமைச்சர் கிரண் ரிஜிஜு கடுமையாக விமர்சித்துள்ளார்.

அரசியலமைப்பு அதிகாரிகளை மிகவும் அநாகரிகமான முறையில் அவமதிப்பது எந்த வகையிலும் ஏற்றுக்கொள்ள முடியாது என்று அவர் சாடியுள்ளார்.

மக்களவை எதிர்க்கட்சித் தலைவர் ராகுல் காந்தி உள்ளிட்ட ‘இந்தியா’ கூட்டணித் தலைவர்கள் உச்ச நீதிமன்றத்தை நோக்கிப் பேரணியாகச் சென்றனர்.

தேர்தல் ஆணையத்தின் செயல்பாடுகள் மற்றும் வாக்கு முறைகேடுகள் குறித்துக் குற்றம் சாட்டி அவர்கள் இந்தப் போராட்டத்தை முன்னெடுத்தனர்.

இந்நிலையில், இது குறித்துக் கருத்து தெரிவித்துள்ள மத்திய அமைச்சர் கிரண் ரிஜிஜு, தங்களது அரசியல் தோல்விகளை மறைப்பதற்காகத் தொடர்ச்சியாக நாடகங்களை அரங்கேற்றுவதாகவும், ஜனநாயக முறைப்படி தேர்ந்தெடுக்கப்பட்ட அரசியலமைப்பு சார்ந்த முக்கிய நிறுவனங்களையும் அதன் அதிகாரிகளையும் எதிர்க்கட்சிகள் இழிவுபடுத்துவது கண்டிக்கத்தக்கது என்றும் தெரிவித்தார்.

மேலும், பொதுமக்களுக்குச் சேவை செய்வதில் கவனம் செலுத்தாமல், இது போன்ற தொடர்ச்சியான போராட்டங்களால் எந்தப் பயனும் ஏற்படப் போவதில்லை என்றும் அவர் குறிப்பிட்டுள்ளார்.