எல் நினோ தாக்கம் : இலங்கை போன்ற பூமத்திய ரேகைக்கு அருகில் உள்ள நாடுகளுக்கு ஆபத்து

உலகம் முழுவதும் வெப்பமான வானிலையை ஏற்படுத்தும் எல் நினோ நிகழ்வு, ஜூலை மற்றும் செப்டம்பர் மாதங்களுக்கு இடையில் தீவிரமடைய வாய்ப்புள்ளது என்று உலக வானிலை ஆய்வு மையம் கணித்துள்ளது.

எல் நினோ வானிலை நிகழ்வுகள் பலவீனமான, மிதமான, வலுவான மற்றும் மிகவும் வலுவானது  என நான்கு நிலைகளாக பிரிக்கப்பட்டுள்ளன.

இந்த முறை எல் நினோ நிகழ்வு மூன்றாவது உச்சநிலையாக வகைப்படுத்தப்பட்டுள்ளது.

மத்திய மற்றும் கிழக்கு பசிபிக் பெருங்கடல் பகுதியில் அசாதாரணமாக உயர்ந்த கடல் மேற்பரப்பு வெப்பநிலையின் இயற்கையான காலநிலை அமைப்பு “எல் நினோ” என்று அழைக்கப்படுகிறது. இது பொதுவாக 2 முதல் 7 ஆண்டுகளுக்கு ஒருமுறை நிகழ்கிறது மற்றும் 9 மாதங்கள் முதல் ஒரு வருடம் வரை நீடிக்கும்.

கடல் வெப்பநிலை இயல்பை விட 1.5°C முதல் 2.0°C வரை அதிகரிப்பதைக் குறிக்கிறது.

இலங்கை போன்ற பூமத்திய ரேகைக்கு அருகிலுள்ள நாடுகள் எல் நினோ நிலையால் நேரடியாகப் பாதிக்கப்படுகின்றன.

தண்ணீர் பற்றாக்குறையால் நெல் மற்றும் பிற பயிர்களின் விளைச்சல் குறையக்கூடும். முக்கிய நீர்த்தேக்கங்களில் நீர்மட்டம் வேகமாக குறைந்து வருவது நீர்மின் உற்பத்தியை சீர்குலைக்கும் அச்சுறுத்தலை ஏற்படுத்துகிறது.

அதிக வெப்பநிலை நீரிழப்பு, வெப்பத்தாக்கம் மற்றும் காய்ச்சல் பரவும் அபாயத்தை அதிகரிக்கிறது. உலகளாவிய காலநிலை மாற்றத்தால் மனிதனால் ஏற்படும் பசுமை இல்ல வாயு வெளியேற்றத்தின் காரணமாக, இயற்கையாக நிகழும் இந்த எல் நினோ நிலைமைகள் வழக்கத்தை விட மிகவும் கடுமையானதாக மாறியுள்ளன என்று சூழலியலாளர்கள் சுட்டிக்காட்டுகின்றனர்.