4,400 ஆண்டுகளுக்கு மேல் பழமையான கப்பலின் சிதைவுகள் கண்டுப்பிடிப்பு

துருக்கியின் கடற்கரைக்கு அப்பால் உலகின் மிகப் பழமையான கப்பல் சிதைவு கண்டுபிடிக்கப்பட்டுள்ளதாக தொல்பொருள் ஆராய்ச்சியாளர்கள் கூறுகின்றனர்.

இவை சுமார்  4,400 ஆண்டுகளுக்கும் மேல் பழமையானவை எனக் குறிப்பிடப்படுகிறது.

துருக்கியின் கெகோவா தீவின் கடற்கரைக்கு அப்பால் கண்டுபிடிக்கப்பட்டுள்ளதாக தொல்பொருள் ஆராய்ச்சியாளர்கள் கூறுகின்றனர்.

ஆரம்ப வெண்கலக் காலத்தைச் சேர்ந்ததும், சுமார் 10 மீட்டர் நீளமுடையதுமான இந்தக் கப்பல், மத்திய தரைக்கடல் முழுவதும் பொருட்களைக் கொண்டு செல்லப் பயன்படுத்தப்பட்டது.

கப்பலின் மரப் பகுதிகள் முற்றிலும் சிதைந்துவிட்ட போதிலும், ஆம்போராக்கள் (Amphorae)  எனப்படும் 30க்கும் மேற்பட்ட மட்பாண்டங்களும், கல் நங்கூரங்களும் கடற்பரப்பில் சிதைவின்றி கண்டெடுக்கப்பட்டுள்ளன.

தொல்பொருள் ஆராய்ச்சியாளர்கள் அந்தப் பாத்திரங்களை மேற்பரப்பிற்குக் கொண்டு வந்து ஆய்வு செய்தபோது, ​​அவற்றில் சிலவற்றில் ஆலிவ் எண்ணெய், ஒயின் அல்லது மரச்சாறு போன்ற பொருட்களின் பிசின் எச்சங்கள் இருப்பது கண்டறியப்பட்டுள்ளது.

பண்டைய உலகின் வர்த்தகப் பாதைகள் மற்றும் கடல்சார் வரலாறு குறித்த முக்கியத் தகவல்களை வெளிப்படுத்தும் இந்தத் தொல்பொருள் கண்டுபிடிப்புகள், துருக்கியின் அன்டால்யாவில் புதிதாகத் திறக்கப்பட்ட   தொல்பொருள் அருங்காட்சியகத்தில் விரைவில் காட்சிக்கு வைக்கப்படும்.