இந்திய எதிர்க்கட்சி தலைவர்மீது வழக்குப் பதிவு

தலைமைத் தேர்தல் ஆணையர் ஞானேஷ் குமார் பதவி விலக வலியுறுத்தி டெல்லியில் நேற்று நடைபெற்ற போராட்டத்தின்போது ஆகாஷ்வாணி பவனுக்குள் அத்துமீறி நுழைந்ததாக ராகுல் காந்தி, பிரியங்கா காந்தி உள்ளிட்டோர் மீது டெல்லி பொலிஸார் வழக்குப்பதிவு செய்துள்ளனர்.

தலை​மைத் தேர்​தல் ஆணை​யர் ஞானேஷ் குமார் பதவி வில​க வலியுறுத்தி இண்டியா கூட்டணி எம்பிக்கள் பங்கேற்ற பேரணி டெல்லியில் நேற்று நடைபெற்றது.

மக்​களவை எதிர்க்​கட்​சித் தலைவர் ராகுல் காந்​தி, காங்​கிரஸ் தலை​வர் மல்​லி​கார்​ஜுன கார்​கே, காங்​கிரஸ் பொதுச்​செய​லா​ளர் பிரி​யங்கா காந்​தி, சமாஜ்​வாதி தலை​வர் அகிலேஷ் யாதவ், திரிண​மூல் காங்​கிரஸ் பொதுச்​செய​லா​ளர் அபிஷேக் பானர்ஜி உள்ளிட்ட எதிர்க்​கட்சி எம்​பிக்கள் சுமார் 300 பேர் இதில் பங்கேற்றனர்.

நாடாளு​மன்ற வளாகத்​தில் இருந்து 3 கி.மீ. தொலை​வுக்கு அவர்கள் பேரணி​யாகச் சென்​றனர். அகில இந்​திய வானொலி நிலை​யம் (ஆகாஷ்வாணி) அரு​கில் பொலிஸார் தடுப்​பு​களை அமைத்து எதிர்க்​கட்சி எம்​பிக்​கள், தலை​வர்​கள், தொண்​டர்​களை தடுத்து நிறுத்​தினர்.

ராகுல் காந்​தி, பிரி​யங்கா காந்தி உள்​ளிட்​டோர் தடுப்​பு​களின் மீது ஏறி கோஷமிட்​டனர். பின்​னர் அகில இந்​திய வானொலி நிலைய வளாகத்​தில் ராகுல் காந்தி உள்​ளிட்​டோர் தர்​ணா​வில் ஈடு​பட்​டனர்.

அவர்களை டெல்லி போலீ​ஸார் வேனில் ஏற்​றினர். எனினும், ராகுலும் பிரி​யங்கா​வும் வேனில் இருந்து இறங்கி மீண்​டும் வானொலி நிலைய வளாகத்​தில் நுழைந்​தனர்.

ராகுல் காந்​தி, பிரி​யங்கா காந்​தி, 50 எம்​பிக்​கள் உட்பட 250 பேர் வானொலி நிலைய வளாகத்​தில் தொடர் தர்​ணா​வில் ஈடு​பட்​டனர். சுமார் 9 மணி நேரத்​துக்​கும் மேலாக அவர்​களின் தர்ணா நீடித்​தது. இரவு 8 மணி அளவில் டெல்லி போலீ​ஸார் அவர்களை கைது செய்து அங்​கிருந்து வலுக்​கட்​டாய​மாக வெளி​யேற்​றினர்.

இந்நிலையில், அத்துமீறி நுழைந்தது தொடர்பாக ஆகாஷ்வாணி ஊழியர்கள் அளித்த புகாரின் அடிப்படையில் ராகுல் காந்தி, பிரியங்கா காந்தி உள்பட 10 எம்பிக்கள் மற்றும் பலர் மீது டெல்லி பொலிஸார் குற்றவியல் வழக்கு பதிவு செய்துள்ளனர்.

ராகுல் காந்தி ஆகாஷ்வாணி பவனுக்குள் அத்துமீறி நுழைந்தார் என்ற குற்றச்சாட்டை காங்கிரஸ் எம்பி இம்ரான் மசூத் மறுத்துள்ளார்.