ஈரான் ஆதரவு குழுக்களுக்கு பிரித்தானியா எச்சரிக்கை

நியூயார்க்கில் நடைபெற்று வரும் ஐ.நா. பொதுச் சபை கூட்டத்தின் உப நிகழ்வொன்றின்போது, பிரித்தானியா வெளியுறவுச் செயலர் எட் மிலிபாண்ட் (Ed Miliband), ஈரானிய வெளியுறவுத் துறை அமைச்சர் அப்பாஸ் அராக்சியைச் (Abbas Araqchi) சந்தித்து பேச்சு நடத்தினார்.

இதன்போது ஈரான் ஆதரவு குழுக்களால் பிரித்தானிய மண்ணில் மேற்கொள்ளப்படும் அச்சுறுத்தல்கள், பயமுறுத்தல்கள் அல்லது விரோத நடவடிக்கைகளைத் தமது நாடு “சகித்துக் கொள்ளாது” என்று அவர் திட்டவட்டமாகத் தெரிவித்தார்.

மத்திய கிழக்கில் நிலவும் போர்ச் சூழல், ஹோர்முஸ் நீரிணையை மீண்டும் திறப்பதன் முக்கியத்துவம் மற்றும் பிரித்தானிய யூத சமூகத்தின் மீதான தாக்குதல்கள் உட்பட ஈரான் தொடர்புடைய குழுக்களின் அச்சுறுத்தல்களை எதிர்கொள்வதில் பிரித்தானியாவின் உறுதியான நிலைப்பாடு ஆகியவை குறித்து இரு தலைவர்களும் விவாதித்ததாகப் பிரித்தானிய வெளியுறவு அலுவலக அறிக்கை தெரிவித்துள்ளது.

பிரித்தானிய வெளியுறவுச் செயலரின் கருத்துகளுக்கு ஈரான் வெளிவிவகார அமைச்சர் வழங்கிய பதில்கள் தொடர்பான தகவல் அறிக்கையில் இடம்பெறவில்லை.

இருப்பினும், அராக்சியின் டெலிகிராம் பக்கத்தில் வெளியிடப்பட்ட அறிக்கையில், “ஈரான் மற்றும் பிராந்திய முன்னேற்றங்கள் தொடர்பாகச் சில ஐரோப்பிய அரசாங்கங்களின் சீரழிவு மற்றும் பொறுப்பற்ற அணுகுமுறைகளைச் சரிசெய்ய வேண்டும்” என்று இச்சந்திப்பின் போது வலியுறுத்தியதாகத் தெரிவிக்கப்பட்டுள்ளது.