3 ஆண்டுகளும், ஆறாத வடுக்களும்: அஞ்சலியில் உறைந்த இஸ்ரேல்
2023 ஒக்டோபர் 07 ஆம் திகதி இஸ்ரேல் மீது ஹமாஸ் நடத்திய தாக்குதலின் மூன்று ஆண்டு நிறைவைக் குறிக்கும் வகையில் இஸ்ரேலியர்கள் புதன்கிழமை நினைவஞ்சலி செலுத்துகின்றனர்.
இத்தாக்குதலானது காசாவின் பெரும்பகுதியை அழித்த இராணுவத் தாக்குதலுக்கு வழிவகுத்தது. போரை நிரந்தரமாக நிறுத்துவதற்காக ஒரு வருடத்திற்கு முன்பு அறிவிக்கப்பட்ட போர்நிறுத்த ஒப்பந்தம் அமுலில் உள்ளபோதிலும், காசாவில் நிலமை இன்னும் மோசமாகவே உள்ளது.
ஹமாஸ் தீவிரவாதிகள் 1,200 பேரைக் கொன்று, 251 பேரைப் பிணைக்கையாலிகளாகக் கடத்திச் சென்ற இந்தத் தாக்குதல், இஸ்ரேல் வரலாற்றிலேயே மிக மோசமான இரத்தக்களரி நாளாகப் பதிவானது.
அதைத் தொடர்ந்து இஸ்ரேல் நடத்திய குண்டுவீச்சு மற்றும் தரைவழித் தாக்குதல்களில் காசாவில் 74,000-க்கும் மேற்பட்டோர் கொல்லப்பட்டுள்ளதாக அங்குள்ள சுகாதார அதிகாரிகள் தெரிவிக்கின்றனர்.
புதன்கிழமை அன்று, காசா எல்லைக்கு அருகில் உள்ள ‘நோவா’ (Nova) இசைவிழா நடந்த இடத்தில் இஸ்ரேலியர்கள் மெழுகுவர்த்தி ஏந்தி அஞ்சலி செலுத்துகின்றனர்.
அந்தத் தாக்குதலின் போது அங்கு 348 இளைஞர்கள் தீவிரவாதிகளால் கொல்லப்பட்டனர். மேலும், தெல் அவீவில் உள்ள ‘ஹோஸ்டேஜ் ஸ்கொயர்’ (Hostage Square) என்ற இடத்திலும் இந்த ஆண்டு நினைவேந்தல் நிகழ்வு நடைபெறவுள்ளது.
இஸ்ரேல் தேர்தலுக்கு இன்னும் 20 நாட்களே உள்ளன
இத்தாக்குதலுக்குப் பிறகு நடைபெறவுள்ள முதல் இஸ்ரேலியத் தேர்தலுக்கு இன்னும் 20 நாட்களே உள்ள நிலையில் இந்த நினைவேந்தல் வந்துள்ளது. இந்தத் தேர்தல் பிரதமர் பெஞ்சமின் நெதன்யாகுவின் நீண்டகால ஆட்சி அதிகாரத்திற்கான ஒரு தீர்மானமிக்க வாக்கெடுப்பாகப் பார்க்கப்படுகிறது.
பாதுகாப்பு வீழ்ச்சிக்கான பொறுப்பை ஏற்க மறுத்துள்ள நெதன்யாகு, இதுகுறித்த சுதந்திரமான விசாரணைக்கான கோரிக்கைகளையும் எதிர்த்து வருகிறார்.
இது இத்தாக்குதலில் கொல்லப்பட்டவர்களின் குடும்பத்தினர் உட்பட பலரையும் விரக்தியடையச் செய்துள்ளது. பாதிக்கப்பட்ட குடும்பங்களைச் சேர்ந்த சிலர் தற்போது தேர்தல் களத்திலும் குதித்துள்ளனர்.
இஸ்ரேல் ஜனநாயக நிறுவனம் (Israel Democracy Institute) நடத்திய கருத்துக் கணிப்பில், 68% யூத இஸ்ரேலியர்கள் எந்தக் கட்சிக்கு வாக்களிப்பது என்பதைத் தீர்மானிப்பதில் அக்டோபர் 7 சம்பவங்களே மிக முக்கியமான காரணியாக இருக்கும் என்று தெரிவித்துள்ளனர்.
இருப்பினும், இன்று தேர்தல் நடத்தப்பட்டால் நெதன்யாகுவோ அல்லது அவரது முக்கியப் போட்டியாளர்களோ நாடாளுமன்றத்தில் ஆட்சி அமைக்கத் தேவையான பெரும்பான்மை இடங்களைக் கைப்பற்ற முடியாது என்றே தேர்தல் கருத்துக் கணிப்புகள் காட்டுகின்றன.
