விஷம் செலுத்தியும் ஓயாத மூச்சு: மரண தண்டனையை வென்ற கைதி

மூன்று தசாப்தங்களுக்கு முன்னர் சக மாணவியைக் கொலை செய்த வழக்கில் மரண தண்டனை விதிக்கப்பட்ட கிறிஸ்டா பை (Christa Pike), டென்னசி (Tennessee) மாநிலத்தின் ஊசி மூலம் விஷம் செலுத்தும் மரண தண்டனை முயற்சியில் இருந்து புதன்கிழமை இரவு உயிர் தப்பியுள்ளதாக சிறைத்துறை அதிகாரிகள் தெரிவித்துள்ளனர்.

இரு நூற்றாண்டுகளில் பெண் ஒருவருக்கு மரண தண்டனையை நிறைவேற்ற அம்மாநிலம் மேற்கொண்ட முதல் முயற்சி தோல்வியில் முடிந்துள்ளது.

நாஷ்விலில் உள்ள ரிவர்பெண்ட் பாதுகாப்புச் சிறையிலிருந்து (Riverbend Maximum Security Institution) மருத்துவச் சிகிச்சைக்காக கிறிஸ்டா பை அழைத்துச் செல்லப்பட்டதை அடுத்து, அவரது தற்போதைய உடல்நிலை குறித்த தகவல்கள் உடனடியாக வெளியாகவில்லை.

மேலும், அவரது வழக்கறிஞர்களோ அல்லது அரசாங்கமோ அடுத்து என்ன சட்டப்பூர்வ நடவடிக்கைகளை எடுப்பார்கள் என்பதும் தெளிவாகத் தெரியவில்லை.

குற்றம் நடந்தபோது பைகிற்கு இருந்த வயது, அவர் சிறுவயதில் சந்தித்த பாலியல் துன்புறுத்தல்கள் மற்றும் சிகிச்சையளிக்கப்படாத மனநலப் பிரச்சினைகள் ஆகியவற்றைக் சுட்டிக்காட்டி வழக்கறிஞர்களும் மனித உரிமை நிபுணர்களும் எதிர்த்தபோதிலும், இத்தண்டனை முயற்சியை டென்னசி சிறைத்துறை நியாயப்படுத்தியுள்ளது.

“சட்டமா அதிபர் அலுவலகத்தால் அங்கீகரிக்கப்பட்ட மாநிலத்தின் சட்டப்பூர்வமான மற்றும் நிர்ணயிக்கப்பட்ட நடைமுறைகளைத் டென்னசி சிறைத்துறை துல்லியமாகப் பின்பற்றியது.

இந்த நடைமுறையில் பயன்படுத்தப்படும் வேதிப்பொருள் எப்போதும் பயனுள்ளதாகவே இருந்துள்ளது.

இந்த நடைமுறையில் குறிப்பிடப்பட்டுள்ளதைத் தவிர கூடுதல் நடவடிக்கைகளுக்கு இடமில்லை. கிறிஸ்டா பை வேறு மருத்துவ மனைக்குக் கொண்டு செல்லப்பட்டுள்ளார்” என்று சிறைத்துறை வெளியிட்டுள்ள அறிக்கையில் தெரிவிக்கப்பட்டுள்ளது.

புதன்கிழமை நடைபெற்ற இந்தத் தவறான தண்டனை முயற்சிக்குப் பின்னர், டென்னசி ஆளுநர் பில் லீ (Bill Lee) இந்த ஆண்டு திட்டமிடப்பட்ட அனைத்து மரண தண்டனைகளையும் நிறுத்தி வைப்பதாக அறிவித்துள்ளார்.

மேலும், பைக் விவகாரம் குறித்து “மூன்றாம் தரப்பு மூலமாக விரிவான மறுஆய்வு” நடத்தப்படும் என்றும் உத்தரவிட்டுள்ளார். முன்னதாக, திங்கள்கிழமை அன்று பைக்கின் கருணை மனுவை இவர் நிராகரித்திருந்தார் என்பது குறிப்பிடத்தக்கது.

இலக்கு வைக்கப்பட்ட நரம்பைக் கண்டுபிடிக்க முடியாததால் கடந்த மே மாதம் நபர் ஒருவரின் மரண தண்டனையைச் சிறை அதிகாரிகள் கைவிட்ட நிலையில், டென்னசி மாநிலத்தில் இந்த ஆண்டில் நிகழும் இரண்டாவது தவறான தண்டனை முயற்சி இதுவாகும்.

அமெரிக்காவில் பெண்களுக்கு மரண தண்டனை நிறைவேற்றப்படுவது மிகவும் அரிதானது. 1976-இல் மரண தண்டனை மீண்டும் அமுல்படுத்தப்பட்டதிலிருந்து இதுவரை தண்டனை நிறைவேற்றப்பட்ட 1,683 பேரில் 18 பேர் மட்டுமே பெண்கள் ஆவர்.