புகலிடம் கோருபவர்களை ஒட்டுமொத்தமாக திருப்பியனுப்ப யோசனை – கிரீஸின் சர்ச்சைக்குரிய முன்மொழிவு

சட்டவிரோத குடியேறிகளின் பெருமளவிலான வருகையின்போது, ஐரோப்பிய ஒன்றியத்தில் தஞ்சம் கோருவதற்கான உரிமையை இடைநிறுத்தம் செய்ய வேண்டும் என கிரேக்க குடியேற்றம் மற்றும் தஞ்சம் கோரும் அமைச்சர் தானோஸ் பிளெவ்ரிஸ் Thanos Plevris முன்மொழிந்துள்ளார்.

இந்த சர்ச்சைக்குரிய நடவடிக்கை, ஐரோப்பிய ஒன்றியத்தின் குடியேற்றக் கொள்கையில் ஒரு பெரிய மாற்றத்தைக் ஏற்படுத்தும்.

அத்துடன் குடியேறிகளின் தஞ்சம் கோரும் கோரிக்கைகளைத் தனித்தனியாக மதிப்பீடு செய்யாமலேயே அவர்களைத் திருப்பி அனுப்ப அனுமதிக்கும்.

இதன் விளைவாக, தற்போதைய ஐரோப்பிய ஒன்றியச் சட்டத்தின் கீழ் தடைசெய்யப்பட்டுள்ள “கூட்டுத் திருப்பியனுப்புதல்கள்”  ஏற்படக்கூடும்.

சட்டவிரோத வருகைகளையும், ஐரோப்பிய ஒன்றியத்தின் வெளி எல்லைகளில் குடியேற்றத்தை ஒரு கருவியாகப் பயன்படுத்துவதையும் சமாளிப்பதற்காக, ஐரோப்பிய ஆணையம் வரும் மாதங்களில் முன்வைக்கவிருக்கும் புதிய சட்டமான “ஐரோப்பிய அவசரகால பதிலளிப்புக் கட்டமைப்பு” (European Emergency Response Framework) என்பதில் இந்த முன்மொழிவைச் சேர்க்க வேண்டும் என கிரீஸ் வலியுறுத்தி வருகிறது.

குறிப்பாக சிறப்பு விலக்கு முறை” (Special Derogation Regime) எனப்படும் ஒரு வழிமுறையை ஏதென்ஸ் முன்மொழிந்துள்ளது.

இந்த சிறப்பு விலக்கு முறையானது விதிவிலக்கான சூழ்நிலைகளில் மட்டுமே செயல்படுத்தப்படும்.

இந்த வழிமுறை செயல்படுத்தப்பட்டால், அது புகலிட விண்ணப்பங்களைத் தற்காலிகமாக நிறுத்திவைக்கவும், விரைவுபடுத்தப்பட்ட திருப்பி அனுப்பும் நடைமுறைகளைப் பயன்படுத்தவும், மற்றும் ஐரோப்பிய ஒன்றியத்தின் எல்லை முகமையான ஃபிரான்டெக்ஸிடமிருந்து உடனடி உதவியைப் பெறவும் அனுமதிக்கும்.