வீணானது ஜோஸ் பட்லரின் போராட்டம்: வென்றது இலங்கை அணி 

ஹெடிங்லியில் வியாழக்கிழமை நடைபெற்ற இரண்டாவது ஒருநாள் ODI போட்டியில்,  ஜோஸ் பட்லரின் வீ போராட்டத்தையும் மீறி, இங்கிலாந்து அணியை 16 ரன்கள் வித்தியாசத்தில் வீழ்த்தி இலங்கை அணி த்ரில் வெற்றி பெற்றது.

இதன் மூலம் மூன்று போட்டிகள் கொண்ட ஒருநாள் தொடரை இலங்கை 1-1 எனச் சமன் செய்துள்ளது.

அதிரடி ரன் குவிப்பு நிறைந்த இப்போட்டியில், கேப்டன் குசல் மெண்டிஸின் அதிரடி சதத்தின் உதவியுடன் இலங்கை அணி 50 ஓவர்களில் 6 விக்கெட் இழப்பிற்கு 321 ரன்கள் குவித்தது.

பதிலுக்குக் களமிறங்கிய இங்கிலாந்து அணி, ஜோஸ் பட்லரின் சிறப்பான ஆட்டத்தால் எளிதான வெற்றியை நோக்கிச் சென்று கொண்டிருந்தது. ஆனால், துரதிர்ஷ்டவசமாக அவருக்குத் தொடைப் தசைநார் (Hamstring) காயம் ஏற்பட்டது.

67 ரன்கள் எடுத்திருந்தபோது காயத்தால் வெளியேறிய பட்லர், பின்னர் இலங்கை அணி முக்கிய விக்கெட்டுகளை வீழ்த்தி போட்டியைத் தன் பக்கம் திருப்பியதால், கடைசி இரண்டு ஓவர்களில் வெற்றிக்கு 20 ரன்கள் தேவைப்பட்ட போது நொண்டி அடித்தபடியே மீண்டும் களத்திற்கு வந்தார்.

இருப்பினும், அவரால் மேற்கொண்டு 2 ரன்கள் மட்டுமே சேர்க்க முடிந்தது.

டீப் மிட்-விகெட் திசையில் அவர் கேட்ச் ஆகி வெளியேறியதும், இங்கிலாந்து அணியின் வெற்றி நம்பிக்கையும் தகர்ந்தது. இறுதியில் இங்கிலாந்து அணி 50 ஓவர்களில் 9 விக்கெட் இழப்பிற்கு 305 ரன்கள் மட்டுமே எடுத்து தோல்வியடைந்தது.

கடைசி 10 ஓவர்களில் வெற்றிக்கு 63 ரன்கள் மட்டுமே தேவைப்பட்ட நிலையில், இலங்கை பந்துவீச்சாளர்கள் அபாரமாகப் பந்துவீசி அணியைக் கட்டுப்படுத்தினர்.

முன்னதாக T20 தொடரில் 3-0 எனத் தொடரை இழந்து ஒயிட்வாஷ் செய்யப்பட்டிருந்த இலங்கை அணிக்கு, இந்தச் சுற்றுப்பயணத்தில் கிடைத்த முதல் வெற்றி இதுவாகும்.

முன்னதாக செஸ்டர்-லீ-ஸ்ட்ரீட்டில் நடந்த முதல் ஒருநாள் ODI போட்டியில் இங்கிலாந்து 89 ரன்கள் வித்தியாசத்தில் வெற்றி பெற்றிருந்த நிலையில், தொடரைத் தீர்மானிக்கும் கடைசி மற்றும் மூன்றாவது ஒருநாள் போட்டி வரும் ஞாயிற்றுக்கிழமை லண்டனில் உள்ள தி ஓவல் மைதானத்தில் நடைபெறவுள்ளது.