துரத்தும் தோல்வி: மீண்டெழ முடியாமல் தவிக்கும் இத்தாலி

மூன்று தடவைகள் தொடர்ச்சியாக உலகக்கோப்பைக்குத் தகுதிபெறத் தவறிய – நான்கு முறை உலக சாம்பியனான இத்தாலி கால்பந்து அணி தனது மோசமான பார்மில் இருந்து மீள முடியாமல் திணறி வருகிறது.

வெள்ளிக்கிழமை நடைபெற்ற UEFA நேஷன்ஸ் லீக் (UEFA Nations League) போட்டியில், உலகக்கோப்பை காலிறுதி வரை சென்ற பெல்ஜியம் அணி 2-0 என்ற கோல் கணக்கில் சொந்த மண்ணில் இத்தாலியை வீழ்த்தியது.

கடந்த மார்ச் மாதம் போஸ்னியா மற்றும் ஹெர்ஸகோவினாவிடம் (Bosnia and Herzegovina) பிளே-ஆப் போட்டியில் தோல்வியடைந்த பிறகு இத்தாலி விளையாடிய முதல் சர்வதேச ஆட்டம் இதுவாகும்.

சவூதி அரேபியா அணிக்குப் பயிற்சியாளராகச் செல்வதற்காக மூத்த பயிற்சியாளர் பதவியைத் துறந்த ரோபர்ட்டோ மான்சினி (Roberto Mancini), மூன்று ஆண்டுகளுக்குப் பிறகு மீண்டும் இத்தாலி அணியின் பயிற்சியாளராகப் பொறுப்பேற்ற முதல் போட்டியிலேயே இந்தத் தோல்வியை சந்தித்து அவருக்கு கடும் கவலையை ஏற்படுத்தியுள்ளது.

70,000 பேர் அமரக்கூடிய ஸ்டாடியோ ஒலிம்பிகோ (Stadio Olimpico) மைதானத்தில் வெறும் 47,155 ரசிகர்கள் மட்டுமே ஆட்டத்தைக் காண வந்திருந்தனர்.

ஆட்டத்தின் 20-வது நிமிடத்திலேயே பெல்ஜியத்தின் மீகா காட்ஸ் (Mika Godts) தனது முதல் சர்வதேச கோலை அடித்து அணியை முன்னிலை பெறச் செய்தபோது, இத்தாலிய ரசிகர்கள் அதிருப்தியில் கூச்சலிடத் தொடங்கினர்.

தொடர்ந்து, இரண்டாம் பாதியின் நடுப்பகுதியில் டோடி லுகேபாகியோ (Dodi Lukebakio) பெல்ஜியத்தின் இரண்டாவது கோலை அடித்து வெற்றியை உறுதி செய்தார்.

இத்தாலி அணிக்கு இனிவரும் போட்டிகளும் எளிதாக இருக்கப்போவதில்லை. அவர்கள் திங்கள்கிழமை துருக்கியையும், அடுத்த வெள்ளிக்கிழமை பிரான்ஸையும் எதிர்கொள்கின்றனர்.

அதன் பின்னர் நேஷன்ஸ் லீக்கின் முதல் கட்டப் போட்டிகளை முடிவுக்குக் கொண்டுவர போலோக்னாவில் (Bologna) மீண்டும் துருக்கியைச் சந்திக்கவுள்ளனர்.