ரயில் பயணிகளுக்கு முக்கிய அறிவிப்பு – 17, 18 ஆம் திகதிகளில் முடங்கும் சேவை

ரயில் பொது மேலாளரின் பதவி குறித்து அரசாங்கம் இன்னும் ஒரு திட்டவட்டமான முடிவை எடுக்காததால், முன்னர் அறிவிக்கப்பட்டப்படி செப்டம்பர் 17 மற்றும் 18 ஆம் திகதிகளில் திட்டமிட்டப்படி போராட்டத்தை முன்னெடுக்க ரயில்வே தொழிற்சங்கங்கள்  தீர்மானித்துள்ளன.

ரயில்வே தொழிற்சங்கங்களின் இணை ஒருங்கிணைப்பாளர் கசுன் சாமர ஜயசேகர இன்று (14) வெளியிட்ட கூட்டறிக்கையில் இந்தனை தெரிவித்தார்.

இந்தப் போராட்ட நடவடிக்கை தொடர்பாக, போக்குவரத்து அமைச்சகத்தின் செயலாளருக்கும் கூட்டு ரயில்  தொழிற்சங்கங்களின் தலைவருக்கும் அறிவிக்கப்பட்டுள்ளதாகவும் அவர் குறிப்பிட்டுள்ளார்.

இதற்கிடையே  போக்குவரத்து அமைச்சகத்தின் செயலாளருக்கும், ரயில் தொழிற்சங்கங்களின் தலைவருக்கும் இடையே இன்று முக்கிய கலந்துரையாடல் ஒன்றும் இடம்பெற்றுள்ளது.

ரயில்வே திணைக்களத்தில் எழுந்துள்ள நிர்வாக மற்றும் செயல்பாட்டுப் பிரச்சினைகளையும், பயணிகள் சந்தித்து வரும் சேவை இடையூறுகளையும் தொழிற்சங்கப் பிரதிநிதிகள் விரிவாகச் சுட்டிக்காட்டியதாகக் கூறப்படுகிறது.

தற்போதைய  பொது மேலாளரின் நிர்வாகத்தின் மீது தொழிற்சங்கங்கள் முழுமையாக நம்பிக்கையை இழந்துவிட்டதால், அவர் உடனடியாகப் பதவியிலிருந்து நீக்கப்பட வேண்டும் என்று தொழிற்சங்கப் பிரதிநிதிகள் வலியுறுத்தியுள்ளனர்.

இந்தத் தொழிற்சங்க நடவடிக்கையின் ஒரே நோக்கம், ரயில்வே துறையை மறுசீரமைப்பது, திறமையான சேவையை நிறுவுவது மற்றும் பயணிகளுக்கு சிறந்த சேவையை வழங்குவதுதான் என்றும் அவர்கள் சுட்டிக்காட்டியுள்ளனர்.