பிரித்தானியா வரை நுழையும் எபோலா தொற்று – சுகாதார அதிகாரி எச்சரிக்கை

எபோலா நோய் பரவல் பிரித்தானியா வரை செல்லக்கூடும் என ஆப்பிரிக்காவின் முக்கிய சுகாதார அதிகாரிகளில் ஒருவர் எச்சரிக்கை விடுத்துள்ளார்.

காங்கோ ஜனநாயகக் குடியரசில் கடந்த மேமாதம் முதல் பரவி வரும் இந்த தொற்றால் இதுவரை 10,000 பேர் பாதிக்கப்பட்டுள்ளனர்.  அவர்களில் ஏறக்குறைய 5,000 பேர் உயிரிழந்துள்ளனர்.

அரிதான, ஆனால் பெரும்பாலும் உயிரிழப்பை ஏற்படுத்தக்கூடிய இந்த காய்ச்சல், கென்யா, நைஜீரியா மற்றும் உகாண்டாவிலும் கண்டறியப்பட்டுள்ளது.

இந்நிலையில் ஆப்பிரிக்க கண்டத்தின் முதன்மை பொது சுகாதார அமைப்பான ‘ஆப்பிரிக்க நோய் கட்டுப்பாடு மற்றும் தடுப்பு மையத்தின்’  பொது இயக்குநர் டாக்டர் ஜீன் கசேயா Jean Kaseya , எபோலாவின் இந்த வேகமான பரவலை கோவிட் (Covid) பெருந்தொற்றுடன் ஒப்பிட்டுப் பேசியுள்ளார்.

கொரோனா வைரஸ் பெருந்தொற்றின் ஆரம்ப நாட்களில், பல நாடுகள் தங்கள் எல்லைகளைத் தாண்டி வைரஸ் உள்ளே வருவதற்கு ‘எந்த அபாயமும் இல்லை’ என்று கருதின.

‘தகுந்த முன்னெச்சரிக்கை நடவடிக்கைகளை எடுக்காத நாடுகள் பாதுகாப்பாக இருக்க முடியாது என்பதை அனைத்து நாடுகளும் புரிந்துகொள்ள வேண்டும்’ என்று குறிப்பிட்டுள்ளார்.

மேலும் தெரிவித்த அவர், 

‘ஆப்பிரிக்கப் பிராந்தியம் மட்டுமல்ல, உலகின் அனைத்துக் கண்டங்களிலும் உள்ள நாடுகள், தற்போதைய சூழலில் தங்கள் தயார்நிலை அளவையும், சிகிச்சை அளிப்பதற்கான வசதிகளையும் மேம்படுத்திக்கொள்ள வேண்டும்.’

‘ஆப்பிரிக்காவின் மூன்று பிராந்தியங்கள் [எபோலாவால்] பாதிக்கப்படுவது இதுவே முதல்முறை. இந்த நோய் பரவலின் புவியியல் எல்லை முன்னெப்போதும் இல்லாத வகையில் விரிவடைந்துள்ளது.

பிரித்தானியாவோ அல்லது பிற நாடுகளோ இந்த நோய்த்தொற்றின் மையப்புள்ளிகளாக மாறுவதை நாங்கள் விரும்பவில்லை’ என்று தெரிவித்தார்.

இதேவேளை இது தொடர்பில் கருத்து வெளியிட்டுள்ள பிரித்தானிய  பொது சுகாதாரப் பதிலளிப்புப் பிரிவின் தலைவர் டாக்டர் சாம் காலின்ஸ், தங்கள் முகமை நிலைமையைக் கண்காணித்து வருவதாகக் குறிப்பிட்டார்.

‘காங்கோ ஜனநாயகக் குடியரசு (DRC) மற்றும் அதனைச் சுற்றியுள்ள பகுதிகளில் நிலவும் எபோலா பரவல் மிகவும் தீவிரமானது.

இருப்பினும், பிரித்தானியாவில்  உள்ள பொதுமக்களுக்கு இதனால் ஏற்படும் ஆபத்து குறைவுதான்’ என்று  கூறினார்.

‘வெளிநாட்டிலிருந்து எபோலா பாதிப்புடன் கூடிய நபர்கள் இங்கு வரும் சூழல் ஏற்பட்டால், அதை எதிர்கொள்ளவும், பாதுகாப்பான மற்றும் பயனுள்ள நடவடிக்கைகளை எடுக்கவும் பிரித்தானியா  முழுமையாகத் தயாராக உள்ளது.’ எனவும் அவர் மேலும் தெரிவித்தார்.