ஈஸ்டர் ஞாயிறு குண்டு தாக்குதல் – குற்றவாளிகளுக்கு 200 முதல் 260 ஆண்டுகள் கடூழிய சிறை

ஈஸ்டர் ஞாயிறு பயங்கரவாதத் தாக்குதல் வழக்கில் குற்றவாளிகளாக இனங்காணப்பட்டுள்ள 15 பேருக்கு தலா 200 முதல் 260 ஆண்டுகள் வரையிலான கடூழிய சிறை தண்டனை விதித்து மேல்நீதிமன்றம் தீர்ப்பளித்துள்ளது.

கொழும்பு நிரந்தர மேல் நீதிமன்றத்தின் சிறப்பு அமர்வு (Trial-at-Bar) நேற்று இந்த வழக்கின் விசாரணைகளை நிறைவு செய்த நிலையில் தீர்ப்பை அறிவித்தது.

இதற்கமைய குற்றவாளிகளில் ஒருவருக்கு 260 ஆண்டுகள் கடுமையான சிறைத்தண்டனையும், நான்கு பேருக்கு 240 ஆண்டுகள் கடுமையான சிறைத்தண்டனையும், மேலும் ஐந்து பேருக்கு 220 ஆண்டுகள் கடுமையான சிறைத்தண்டனையும், மற்ற ஐந்து பேருக்கு 200 ஆண்டுகள் கடுமையான சிறைத்தண்டனையும் விதித்து தீர்ப்பளிக்கப்பட்டுள்ளது.

அத்துடன் குற்றவாளிகளின் அசையும் மற்றும் அசையாச் சொத்துக்களை பறிமுதல் செய்யவும் நீதிமன்றம் உத்தரவு பிறப்பித்துள்ளது.

2019 ஆம் ஆண்டு இடம்பெற்ற இந்த கொடிய தாக்குல்  கொழும்பில் உள்ள மூன்று கத்தோலிக்க தேவாலயங்கள் மற்றும் மூன்று முன்னணி ஹோட்டல்களைக் குறிவைத்து, முன்னெடுக்கப்பட்டிருந்தது.

தற்போது தடைசெய்யப்பட்ட ‘தேசிய தவ்ஹீத் ஜமாத்’ (NTJ) அமைப்பின் உறுப்பினரான சஹ்ரான் ஹாஷிம் உட்பட ஒன்பது தற்கொலை குண்டுதாரிகளால் இத்தாக்குதல்கள் நடத்தப்பட்டன.

இந்த ஒருங்கிணைந்த தாக்குதல்களில் வெளிநாட்டினர் உட்பட 269 பேர் கொல்லப்பட்டனர்; குழந்தைகள் உட்பட 500-க்கும் மேற்பட்டோர் காயமடைந்தனர். இச்சம்பவம் சர்வதேச அளவில் பெரும் கவனத்தை ஈர்த்திருந்தது.

தாக்குதல்கள் குறித்த விசாரணைகளைத் தொடர்ந்து, சதித்திட்டம் தீட்டியது, தாக்குதல்களுக்கு உதவியது மற்றும் ஈஸ்டர் ஞாயிறு குண்டுவெடிப்புகள் தொடர்பான பிற குற்றச்சாட்டுகள் என மொத்தம் 23,270-க்கும் மேற்பட்ட குற்றச்சாட்டுகளின் கீழ் 25 பேர் மீது வழக்கு பதிவு செய்யப்பட்டு சட்டநவடிக்கைகள் முன்னெடுக்கப்பட்டிருந்தன.

நௌஃபர் மௌலவி உள்ளிட்ட 25 பேர் மீது சட்டமா அதிபரால் தாக்கல் செய்யப்பட்ட இவ்வழக்கில், மொத்தம் 2,309 அரசுத் தரப்பு சாட்சிகள் சாட்சியமளித்தனர். பல ஆண்டுகளாக நடைபெற்ற விசாரணைகள் ஆகஸ்ட் 24 அன்று நிறைவடைந்ததுடன், இறுதி தீர்ப்பு 22.09 அன்று வழங்கப்படும் என திகதி நிர்ணயிக்கப்பட்டிருந்தது.

இதற்கமைய நீதிபதிகளான நவரத்ன மராசிங்க, ராமநாதன் கண்ணன் மற்றும் சுஜீவ நிஸ்ஸங்க ஆகியோரைக் கொண்ட உயர் நீதிமன்றத்தின் மூவர் அடங்கிய சிறப்பு அமர்வு (Trial-at-Bar), இறுதித் தீர்ப்பை நேற்று அறிவித்துள்ளது.

தீர்ப்பை வாசித்த தலைமை நீதிபதி நவரத்ன மராசிங்க, தீர்ப்பு மிக நீண்டதாக இருப்பதால், மிக முக்கியமான அம்சங்களை மட்டுமே திறந்த நீதிமன்றத்தில் வாசிப்பதாகக் கூறினார்.

குற்றஞ்சாட்டப்பட்டவர்களுக்கு எதிரான குற்றப்பத்திரிகை ஒன்பது தொகுதிகளையும், சுமார் 8,900 பக்கங்களையும் கொண்டிருந்ததாக நீதிபதி குறிப்பிட்டார்.

ஈஸ்டர் ஞாயிறு தாக்குதல்களை நடத்துவதற்கான சதித்திட்டம் தீட்டியது, அத்தாக்குதல்களுக்கு உதவி மற்றும் உடந்தையாக இருந்தது, தீவிரவாதக் கருத்துக்களை ஊக்குவித்தது மற்றும் பல்வேறு இனக்குழுக்களிடையே பிளவை ஏற்படுத்தியது ஆகிய குற்றச்சாட்டுகளின் கீழ், பயங்கரவாதத் தடுப்புச் சட்டத்தின் பிரிவு 2(1)(h) மற்றும் 2(2)-ன் படி தண்டனைக்குரிய குற்றங்களைச் செய்ததாக அவர்கள் மீது குற்றம் சாட்டப்பட்டிருந்ததாக நீதிபதி தெரிவித்தார்.

எனவே, ஈஸ்டர் ஞாயிறு தாக்குதல்களுக்கு முன்னதாக நடத்தப்பட்ட தீவிரவாதப் பிரச்சாரங்கள் மற்றும் ஆயுதப் பயிற்சி நடவடிக்கைகள், அத்துடன் பயிற்சி முகாம்கள் மற்றும் பாதுகாப்பான மறைவிடங்களை அமைத்தல் மற்றும் பராமரித்தல் ஆகியவை தொடர்பான ஆதாரங்களை நீதிமன்றம் பரிசீலித்துள்ளதாகவும் அவர் கூறினார்.

சதித்திட்டத்தில் பங்கேற்றதை தீர்மானிப்பதில் நீதிமன்றம் பின்பற்றிய அணுகுமுறையை விளக்கிய தலைமை நீதிபதி நவரத்ன மராசிங்க, “சதித்திட்டத்தில் ஈடுபடுபவர்கள் அனைவரும் ஒரே இடத்தில் நேர்கோட்டில் நிற்க வேண்டிய அவசியமில்லை. ஒரு சதித்திட்டம் அல்லது உடன்படிக்கை நேரடியானதாகவோ அல்லது மறைமுகமானதாகவோ இருக்கலாம். ஆரம்பத்தில் இணைந்தவர்கள், இடையில் இணைந்தவர்கள் மற்றும் இறுதியில் இணைந்தவர்கள் என அனைவரும் அந்தச் சதித்திட்டத்தின் ஒரு பகுதியாக இருக்க முடியும்,” என்று கூறினார்.

தொடர்ந்து, குற்றம் சாட்டப்பட்ட ஒவ்வொருவரும் முன்வைத்த தற்காப்பு வாதங்களையும் நீதிமன்றம் பரிசீலித்ததாக நீதிபதி தெரிவித்தார்.

முதல் குற்றவாளியான முகமது இப்ராகிம் முகமது நௌஃபர் (நௌஃபர் மௌலவி என்றும் அழைக்கப்படுபவர்), இரண்டாவது குற்றவாளி கஃபூர் மாமா, மூன்றாவது குற்றவாளி ஹயாத்து முகமது மில்கான், நான்காவது குற்றவாளி முகமது இப்ராகிம் சாதிக் அப்துல்லா, ஐந்தாவது குற்றவாளி முகமது இப்ராகிம் சாஹித் அப்துல்லா மற்றும் குற்றவாளிகளாகக் கண்டறியப்பட்ட மொத்தம் 15 பேரில் அடங்கும் ஏனையோர் முன்வைத்த தற்காப்பு வாதங்களை நீதிமன்றம் நிராகரித்தது.

இருப்பினும், எஞ்சியிருந்த ஒன்பது குற்றவாளிகள் முன்வைத்த தற்காப்பு வாதங்களை நீதிமன்றம் ஏற்றுக்கொண்டதாக உயர் நீதிமன்ற நீதிபதி தெரிவித்தார்.   அனைத்துச் சான்றுகளையும் பரிசீலித்த பின்னர் நீதிபதிகள் ஒருமனதாகத் தங்கள் முடிவுகளுக்கு வந்துள்ளதாகவும் நீதவான் தெரிவித்தார்.

அதன்படி, இந்த வழக்கில் முதல், இரண்டாம், மூன்றாம், நான்காம், ஐந்தாம், ஆறாம், ஏழாம், எட்டாம், ஒன்பதாம், பத்தாம், பதினொன்றாம், பதினைந்தாம், பதினாறாம், பதினேழாம் மற்றும் பதினெட்டாம் பிரதிவாதிகளுக்கு எதிராக அரசுத் தரப்பால் கொண்டுவரப்பட்ட குற்றச்சாட்டுகள் நியாயமான சந்தேகத்திற்கு அப்பாற்பட்டு நிரூபிக்கப்பட்டுள்ளன என்றும் குற்றவாளிகளுக்கு  200 முதல் 260 ஆண்டுகள் வரையிலான கடுமையான சிறைத்தண்டனையை விதித்து தீர்ப்பளிப்பதாகவும் அறிவித்துள்ளது.