கிரீன்லாந்தில் கச்சா எண்ணெய் ஆய்வை நடத்த அமெரிக்க நிறுவனம் முயற்சி

முறையான அனுமதி இல்லாமல் துளையிடும் கருவிகளைக் கரைக்குக் கொண்டு சென்றதற்காக, டெக்சாஸை தளமாகக் கொண்ட கிரீன்லாந்து எனர்ஜி நிறுவனத்திற்கு கிரீன்லாந்து அரசாங்கம் கடுமையான எச்சரிக்கை விடுத்துள்ளது.

ஜேம்சன் லேண்ட் படுகையில் 1 டிரில்லியன் டொலர் மதிப்பிலான கச்சா எண்ணெய் இருப்பதாக நம்பும் கிரீன்லாந்து எனர்ஜி, அங்கு ஆய்வுத் துளையிடுதலுக்காக 60 மில்லியன் டொலர் முதலீடு செய்ய இலக்கு வைத்துள்ளது.

அந்நிறுவனத்தின் முந்தைய  அனுமதி காலாவதியாகிவிட்டதை பிராந்திய அதிகாரிகள் உறுதிப்படுத்தினர். மேலும் எதிர்கால தளவாடங்கள் அனைத்திற்கும் முன் அனுமதி தேவை என்றும் எச்சரித்தனர்.

அமெரிக்காவின் தேசியப் பாதுகாப்பு நோக்கங்களுக்காக கிரீன்லாந்தின் கட்டுப்பாட்டைப் பெறுவதற்கான அதிபர் டொனால்ட் ட்ரம்பின் தொடர்ச்சியான முயற்சிகளுக்கு மத்தியில் இந்தச் சம்பவம் நிகழ்ந்துள்ளது.

தங்கள் இலக்குகள் அமெரிக்காவின் இணைப்புடன் தொடர்பில்லாதவை என்றும், அக்டோபரில் துளையிடும் பணிகளைத் தொடங்க இறுதி ஒப்புதல்களைப் பெற நம்புவதாகவும் கிரீன்லாந்து எனர்ஜி கூறியுள்ளது.