இலங்கை சிங்கள, பௌத்த நாடு: திலீபனை நினைவுகூர முடியாது

“இலங்கை சிங்கள, பௌத்த நாடாகும். ஒரே நாடு ஒரே சட்டம் என்பதே அமுலில் இருக்க வேண்டும். வடக்கில் திலீபனுக்கு நினைவேந்தல் நடத்துவது தெற்கில் உள்ள சிங்கள மக்களுக்கு வலிக்கின்றது.”- என்று ஜனசெத்த பெரமுனவின் தலைவர் பத்தரமுல்லே சீலரத்தன தேரர் தெரிவித்தார்.

இது தொடர்பில் அவர் மேலும் கூறியவை வருமாறு,

“ திலீபனுக்கு உருவச்சிலை வைத்து திலீபனுக்கு நினைவேந்தல் நடத்தப்பட்டுள்ளது. இந்நிகழ்வு நடத்தப்படும்போது அரசாங்கம் என்ன செய்து கொண்டிருக்கின்றது?

பயங்கரவாதி என்பவர் பயங்கரவாதிதான். அவரை அப்பாவியாக கருத முடியாது. டயஸ்போராக்களின் தேவைக்கேற்பவே இப்படியான நிகழ்வுகள் நடக்கின்றன.

திலீபனுக்கு நினைவேந்தல் நடக்கும்போது சிங்கள மக்களுக்கு அது வேதனையை ஏற்படுத்துகின்றது. அப்பாவி சிங்கள மக்களின் பிள்ளைகள்தான் போருக்கு சென்றனர். பிள்ளைகளை இழந்த பெற்றோருக்கு இது எவ்வளவு தாக்கத்தை ஏற்படுத்தும்.

இது சிங்கள, பௌத்த மற்றும் பௌத்த கலாசார நாடாகும். அனைவருக்கும் ஒரே நாடு, ஒரே சட்டம் என்பதே பொருந்த வேண்டும்”- என்றார் தேரர்.