வளைகுடா எரிசக்தி மையங்கள் மீது தாக்குதல்: அமெரிக்காவிற்கு ஈரான் பகிரங்க எச்சரிக்கை

அமெரிக்கா தங்கள் நாட்டின் மீது புதிய தாக்குதல் ஏதேனும் நடத்தும் பட்சத்தில், அது வளைகுடா பிராந்தியம் முழுவதிலும் உள்ள முக்கிய எரிசக்தி உள்கட்டமைப்புகள் மீது கடுமையான பதிலடித் தாக்குதலுக்கு வழிவகுக்கும் என்று வளைகுடா நாடுகளுக்கு ஈரான் எச்சரிக்கை விடுத்துள்ளது.

வாஷிங்டனின் மிக நெருங்கிய பிராந்திய நட்பு நாடுகளை அச்சுறுத்துவதன் மூலம், ராணுவ நடவடிக்கையின் விளைவுகளை அமெரிக்காவிற்கு உணர்த்த ஈரான் முற்படுகின்றது என நிபுணர்கள் சுட்டிக்காட்டுகின்றனர்.

கடந்த ஜூலை 28 அன்று, ஈரானின் எரிசக்தி வலையமைப்பு மற்றும் உள்கட்டமைப்புகளைத் தாக்குவோம் என அதிபர் டொனால்ட் டிரம்ப் அச்சுறுத்தியதைத் தொடர்ந்து, ஈரான் மேற்கொண்ட உயர்மட்ட தூதரகத் தொடர்புகளின் போது இந்த எச்சரிக்கை விடுக்கப்பட்டதாக அந்த ஆதாரங்கள் தெரிவித்தன.

இரு மூத்த ஈரானிய அதிகாரிகள், இரு வளைகுடா ஆதாரங்கள் மற்றும் இந்த பேச்சுவார்த்தைகள் குறித்து அறிந்த மூத்த பிராந்திய தூதர் ஒருவர் தெரிவித்த தகவலின்படி, ஈரானிய வெளியுறவு அமைச்சர் அப்பாஸ் அராக்சி (Abbas Araqchi), சவூதி, துருக்கி மற்றும் கட்டார் ஆகிய நாடுகளின் வெளியுறவு அமைச்சர்களுடனும், பாகிஸ்தான் ராணுவத் தளபதியுடனும் உரையாடியுள்ளார்.

ஈரான் மீது மீண்டும் தாக்குதல் நடத்துவதிலிருந்து டிரம்பை தடுக்குமாறு, வாஷிங்டனின் வளைகுடா நட்பு நாடுகளிடம் அராக்சி வலியுறுத்தியதாக சிரேஷ்ட ராஜதந்திரி ஒருவர் குறிப்பிட்டுள்ளார்.

ஈரான் மீதான எந்தவொரு தாக்குதலும் வளைகுடா பகுதி முழுவதிலும் உள்ள அமெரிக்க சொத்துக்கள் மற்றும் எரிசக்தி வசதிகள் மீது பதிலடி கொடுக்கத் தூண்டும் என ஈரான் வெளிவிவகார அமைச்சர் குறிப்பிட்டாரென சர்வதேச ஊடகமொன்று செய்தி வெளியிட்டுள்ளது.