South Ossetia தேர்தலில் ரஷ்ய விசுவாசி வெற்றி: புடின் நிர்வாகம் வரவேற்பு

ஜார்ஜியாவிலிருந்து பிரிந்து சென்று ரஷ்யாவின் ஆதரவுடன் செயல்படும் தெற்கு ஒசேஷியா (South Ossetia) பிராந்தியத்தின் ஜனாதிபதியாக முன்னாள் ரஷ்ய மத்திய அரசு அதிகாரி ஒருவர் தேர்ந்தெடுக்கப்பட்டுள்ளார்.

இந்தத் தேர்தல் முடிவுகள், ரஷ்யாவுடன் நெருக்கமான உறவை ஏற்படுத்திக் கொள்ள அப்பிராந்தியம் விரும்புவதைக் காட்டுவதாக மாஸ்கோ சனிக்கிழமை வரவேற்பு தெரிவித்துள்ளது.

புதிய ஜனாதிபதியாகத் தேர்ந்தெடுக்கப்பட்டுள்ள மாரட் காம்போலோவ் (Marat Kambolov), காக்கசஸ் மலைத்தொடரின் மறுபக்கத்திலுள்ள ரஷ்யக் குடியரசான வடக்கு ஒசேஷியாவைச் சேர்ந்தவராவார்.

1990களின் தொடக்கத்தில் சோவியத் யூனியனின் சரிவின் போது ஜார்ஜியாவிலிருந்து பிரிந்து, பின்னர் ரஷ்ய ஆதரவுடன் நடைமுறைச் சுதந்திரத்தைப் பெற்ற தெற்கு ஒசேஷியாவுடன் காம்போலோவுக்கு முன்னைய தொடர்புகள் எதுவும் இல்லை.

2008 இல் ரஷ்யாவிற்கும் ஜார்ஜியாவிற்கும் இடையே ஏற்பட்ட குறுகிய காலப் போரினால், தெற்கு ஒசேஷியாவில் முன்னர் தங்கள் கட்டுப்பாட்டில் வைத்திருந்த பகுதிகளிலிருந்து ஜார்ஜியப் படைகள் வெளியேற்றப்பட்டன.

“இந்த முடிவுகள், உள்நாட்டு அரசியல் ஸ்திரத்தன்மை, முன்னேற்றம் மற்றும் ரஷ்யக் கூட்டமைப்புடனான உறவுகளின் விரிவான வளர்ச்சி ஆகியவற்றிற்கான தெற்கு ஒசேஷிய சமூகத்தின் பரவலான விருப்பத்தை வெளிப்படுத்துகின்றன” என்று ரஷ்ய வெளியுறவு அமைச்சகம் தெரிவித்துள்ளது.

சுமார் 50,000 மக்கள் தொகையைக் கொண்ட தெற்கு ஒசேஷியா, உணவு, உபகரணங்கள் மற்றும் ஆற்றல் இறக்குமதிகளுக்கு ரஷ்யாவையே பெரிதும் நம்பியுள்ளதுடன், சொந்தமாகப் பெரிய தொழிற்துறைகள் எதுவும் இல்லாத பகுதியாகவும் உள்ளது.

அங்குள்ள பொதுத்துறை ஊழியர்களின் ஊதியம், ஓய்வூதியம் மற்றும் முக்கிய உள்கட்டமைப்புத் திட்டங்களுக்கு மாஸ்கோவே நிதியளிப்பதுடன், அப்பிராந்தியத்தில் ஒரு இராணுவ முகாமையும் நடத்தி வருகின்றது.

வெள்ளிக்கிழமை நடைபெற்ற தேர்தலில் காம்போலோவ் 85 சதவீத வாக்குகளைப் பெற்று வெற்றி பெற்றதாகவும், அவரை எதிர்த்துப் போட்டியிட்டவர்கள் ஒற்றை இலக்க சதவீத வாக்குகளையே பெற்றதாகவும் ரஷ்ய அரசு ஊடகங்கள் தெரிவித்துள்ளன. இத்தேர்தலில் 73 சதவீத வாக்குகள் பதிவாகியிருந்தன.