உறுப்பு நாடுகளை வளைத்துபோட FIFA தலைவர் புது வியூகம்
சுவிட்சர்லாந்தைச் சேர்ந்த FIFA தலைவர் Gianni Infantino, உலகக் கால்பந்து நிர்வாக அமைப்பின் உறுப்பினர் சங்கங்களுக்கு பல மில்லியன் டாலர்களைப் பகிர்ந்தளிப்பது குறித்து விவாதிக்க விருப்பம் தெரிவித்துள்ளார்.
FIFA தலைவராக Gianni Infantino 10 ஆண்டுகளாக பதவி வகிக்கின்றார். அவரின் தலைமைப் பதவி குறித்து தற்போது கடும் சர்ச்சை எழுந்துள்ளது. எனினும், இப்பதவிக்கு அவர் மீண்டும் போட்டியிட தயாராகி வருகின்றார். இந்நிலையிலேயே ஆதரவு திரட்டும் நோக்கில் அவர் இந்த நகர்வை முன்னெடுத்து வருகின்றார்.
அமெரிக்க ஊடகங்கள் திங்கள்கிழமை வெளியிட்ட தகவலின்படி, ஆறு பிராந்திய கால்பந்து கூட்டமைப்புகளின் தலைவர்களுக்கு Gianni Infantino அனுப்பிய கடிதத்தில், தனிநபர் நாடுகளுக்கான நிதிப் பகிர்வுத் தொகை குறித்து அக்டோபர் 15 அன்று நடைபெறவுள்ள FIFA கவுன்சில் கூட்டத்தின் நிகழ்ச்சி நிரலில் விவாதிக்கப்படும் எனக் குறிப்பிட்டுள்ளார்.
“நிதித் தொகையை நான் முன்கூட்டியே தீர்மானிக்க மாட்டேன்,” என்று Gianni Infantino அக்கடிதத்தில் எழுதியுள்ளார்.
தனது தலைமை மீதான பரவலான விமர்சனங்கள் மற்றும் சட்ட நடவடிக்கைகளின் அச்சுறுத்தல் அதிகரித்து வரும் நிலையிலும், 56 வயதான Gianni Infantino இப்பதவிக்கு மீண்டும் போட்டியிடுவதை இந்த மாத தொடக்கத்தில் உறுதிப்படுத்தினார்.
உலகக் கோப்பை மற்றும் பிற FIFA தொடர்களின் வணிக மற்றும் செயல்பாட்டு அம்சங்களில் கவனம் செலுத்தும் புதிய ‘FIFA பார்வர்ட் என்டர்பிரைஸ்’ (FFE) அமைப்பின் சுமார் 20 சதவீத பங்குகளை விற்பனை செய்யும் திட்டத்தை Gianni Infantino முன்மொழிந்ததில் இருந்தே கடும் எதிர்ப்பை எதிர்கொண்டு வருகிறார்.
சுவிஸ்-இத்தாலி பாரம்பரியத்தைக் கொண்ட இவர், கடந்த 10 ஆண்டுகளாக உலகக் கால்பந்தின் மிகச் சக்திவாய்ந்த மனிதராக இருந்து வருகிறார்.
இருப்பினும், பிராந்திய கால்பந்து கூட்டமைப்புகள் மற்றும் தேசிய சங்கங்களின் ஆதரவை அவர் தொடர்ந்து இழந்து வருகிறார்.
பதவி விலகக் கோரும் குரல்களும், அவரது திட்டங்களுக்கு எதிரான எதிர்ப்புகளும் வலுத்து வந்த போதிலும், தனது பதவியைத் தக்கவைத்துக் கொள்ள கடந்த மாதம் அவர் தீவிர முயற்சிகளை மேற்கொண்டதாகத் தெரிகிறது.
வெள்ளிக்கிழமையன்று, இங்கிலாந்தின் பிரீமியர் லீக் மற்றும் ஐரோப்பாவின் பிற மூன்று முன்னணி லீக்குகள் FIFAவில் நிர்வாக சீர்திருத்தங்களை மேற்கொள்ள வேண்டும் என கோரிக்கை விடுத்தன.
