பரபரப்புக்கு மத்தியில் நாளை கூடுகிறது இலங்கை பாராளுமன்றம்

வரவு-செலவுத் திட்டக் கூட்டத்தொடருக்கு முன்னதாக, நாடாளுமன்றம் நாளை (03) முற்பகல் 9.30 மணிக்கு சபாநாயகர் தலைமையில் கூடவுள்ளது. எதிர்வரும் 6ஆம் திகதி வரை சபை அமர்வுகள் நடைபெறவுள்ளன.

சபாநாயகருக்கு எதிராக ஐக்கிய மக்கள் சக்தியினால் முன்வைக்கப்பட்டுள்ள நம்பிக்கையில்லாப் பிரேரணையை இவ்வாரம் விவாதத்துக்கு எடுத்துக்கொள்ளத் திட்டமிடப்பட்டிருந்தது.

எனினும், 50 குற்றச்சாட்டுகளை உள்ளடக்கி முன்வைக்கப்பட்ட குறித்த நம்பிக்கையில்லாப் பிரேரணையைத் திருத்தி மீண்டும் சமர்ப்பிப்பதற்கு ஐக்கிய மக்கள் சக்தி இதுவரை நடவடிக்கை எடுக்கவில்லை. இதனால், இவ்வாரம் குறித்த பிரேரணை விவாதத்துக்கு எடுத்துக்கொள்ளப்படமாட்டாது எனத் தெரிவிக்கப்படுகிறது.

இதேவேளை, வரவு-செலவுத் திட்டக் கூட்டத்தொடர் ஒரு மாத காலம் நடைபெறவுள்ளதுடன், டிசம்பர் மாதம் முதல் ஒரு மாத காலத்துக்கு நாடாளுமன்றத்துக்கு விடுமுறை வழங்கப்படவுள்ளது.

இதனால், சபாநாயகருக்கு எதிரான நம்பிக்கையில்லாப் பிரேரணை இந்த ஆண்டுக்குள் விவாதத்துக்கு எடுத்துக்கொள்ளப்படுவதற்கான வாய்ப்புகள் இல்லை எனத் தெரியவருகிறது.

இந்நிலையில், இவ்விடயம் தொடர்பாக எதிர்க்கட்சிகள் நாளைய நாடாளுமன்ற அமர்வில் கேள்விகளை எழுப்பத் திட்டமிட்டுள்ளன.

அத்துடன், பொதுநலவாய நாடாளுமன்ற சங்கம் மற்றும் ஏனைய சர்வதேச அமைப்புகளிடமும் முறைப்பாடு செய்வதற்கு எதிர்க்கட்சிகள் திட்டமிட்டுள்ளதாகத் தெரிவிக்கப்படுகிறது.