அமெரிக்கா, சீனாவுக்கிடையில் மீண்டும் வர்த்தகப் போர்

2025ஆம் ஆண்டு இரு நாடுகளுக்கும் இடையில் எட்டப்பட்ட வர்த்தக ஒப்பந்தத்தின் கீழான உறுதிமொழிகளை முழுமையாகவும் உடனடியாகவும் நிறைவேற்றுமாறு சீனாவிடம் அமெரிக்க உயர்மட்ட அதிகாரிகள் வலியுறுத்தியுள்ளனர்.

அமெரிக்க நிதி அமைச்சர் ஸ்கொட் பெசென்ட் மற்றும் அமெரிக்க வர்த்தகப் பிரதிநிதி ஜேமிசன் கிரீர் ஆகியோர், வெள்ளிக்கிழமை சீனப் பிரதமர் லி பெங்குடன் காணொளி ஊடாகக் கலந்துரையாடியுள்ளனர்.

வொஷிங்டன் மற்றும் பீஜிங் இடையிலான வர்த்தக மற்றும் பொருளாதார உறவுகள் தொடர்பில் இந்தக் கலந்துரையாடல் இடம்பெற்றதாக அமெரிக்க வர்த்தகப் பிரதிநிதியின் அலுவலகம் வெளியிட்ட அறிக்கையில் தெரிவிக்கப்பட்டுள்ளது.

இதன்போது, விவசாயப் பொருட்களைக் கொள்வனவு செய்தல், அரிய வகை கனிமங்கள் மற்றும் ஏனைய முக்கிய கனிமங்கள் தொடர்பில் ஏற்கனவே வழங்கிய உறுதிமொழிகளைச் சீனா நடைமுறைப்படுத்துவதற்கான உறுதியான நடவடிக்கைகளை எடுக்க வேண்டியதன் அவசியத்தை ஜேமிசன் கிரீர் வலியுறுத்தியுள்ளார்.

அமெரிக்கா – சீனா வர்த்தக ஒப்பந்தம்

உலகின் இரு மிகப்பெரிய பொருளாதார நாடுகளான அமெரிக்காவுக்கும் சீனாவுக்கும் இடையில், 2025ஆம் ஆண்டு இந்த வர்த்தக ஒப்பந்தம் எட்டப்பட்டது.

தென் கொரியாவின் பூசான் நகரில் நடைபெற்ற ஆசிய – பசுபிக் பொருளாதார ஒத்துழைப்பு (APEC) மாநாட்டின் பக்க நிகழ்வாக, அமெரிக்க ஜனாதிபதி டொனால்ட் ட்ரம்புக்கும் சீன ஜனாதிபதி ஷி ஜின்பிங்குக்கும் இடையில் நடைபெற்ற சந்திப்பின்போதே இந்த ஒப்பந்தம் கைச்சாத்திடப்பட்டது.

ட்ரம்பின் விரிவான வரி விதிப்புக் கொள்கையால் இரு நாடுகளுக்கும் இடையில் பரஸ்பரம் வரி அதிகரிப்பு நடவடிக்கைகள் முன்னெடுக்கப்பட்டிருந்த சூழலில் இந்த ஒப்பந்தம் எட்டப்பட்டது.

ட்ரம்பின் இரண்டாவது ஆட்சிக் காலத்தில் சீனப் பொருட்களுக்கு விதிக்கப்பட்ட அமெரிக்க வரி வீதத்தை சுமார் 20 சதவீதமாகக் கட்டுப்படுத்துவது இந்த ஒப்பந்தத்தின் முக்கிய அம்சமாகும்.

அடுத்த மூன்று ஆண்டுகளுக்கு அமெரிக்காவிடமிருந்து 25 மில்லியன் மெட்ரிக் தொன் சோயாபீன்ஸைக் கொள்வனவு செய்ய சீனா இணக்கம் தெரிவித்திருந்தது.

அத்துடன், அரிய வகை கனிமங்களின் ஏற்றுமதியைத் தொடர்ந்து முன்னெடுப்பதுடன், புதிய ஏற்றுமதிக் கட்டுப்பாடுகளை இடைநிறுத்தவும் பீஜிங் இணங்கியிருந்தது.

தொழில்நுட்பத் துறைக்கு இக்கனிமங்கள் மிகவும் அத்தியாவசியமானவையாகக் கருதப்படுகின்றன. எனினும், கனிம விநியோகம் தொடர்பில் சீனா தனது உறுதிமொழிகளை முறையாக நிறைவேற்றவில்லை என ட்ரம்ப் நிர்வாகம் ஏற்கனவே குற்றம் சாட்டியிருந்தது.

இந்நிலையில், உயர்மட்டக் கலந்துரையாடலுக்குப் பின்னர் தனது எக்ஸ் (X) சமூக வலைத்தளத்தில் பதிவிட்ட அமெரிக்க நிதி அமைச்சர் ஸ்கொட் பெசென்ட், அமெரிக்கத் தொழிலாளர்கள், விவசாயிகள் மற்றும் வர்த்தக நிறுவனங்களுக்குப் பயனளிக்கும் வகையிலும், பொருளாதார மற்றும் தேசியப் பாதுகாப்பை வலுப்படுத்தும் வகையிலும் ட்ரம்ப் நிர்வாகம் தொடர்ந்து கொள்கைகளை முன்னெடுக்கும் எனக் குறிப்பிட்டுள்ளார்.

அமெரிக்காவின் வர்த்தகக் கட்டுப்பாடுகள் குறித்து சீனா கவலை

இதற்கிடையில், அமெரிக்காவுடனான வர்த்தக உறவுகள் தொடர்பில் சீனாவின் பிரதான பேச்சுவார்த்தையாளரான துணைப் பிரதமர் ஹே லிஃபெங், தனது நாட்டைக் குறிவைத்து அமெரிக்கா அண்மையில் விதித்துள்ள வர்த்தகக் கட்டுப்பாடுகள் குறித்து கடும் கவலை வெளியிட்டுள்ளார்.

வெள்ளிக்கிழமை நடைபெற்ற கலந்துரையாடலின்போது அவர் இந்தக் கவலையைத் தெரிவித்ததாக சீன அரச செய்தி நிறுவனமான சின்ஹுவா குறிப்பிட்டுள்ளது.

எனினும், எந்தெந்த வர்த்தகக் கட்டுப்பாடுகள் தொடர்பில் அவர் இந்தக் கருத்தை வெளியிட்டார் என்பது குறித்து விரிவான தகவல்கள் வெளியிடப்படவில்லை.

இரு நாடுகளுக்கும் இடையிலான வர்த்தக உறவை நிலையானதாகப் பேணுவதற்காக ஒத்துழைப்பைத் தொடர்ந்து வலுப்படுத்தவும், கருத்து வேறுபாடுகளை உரிய முறையில் கையாளவும் இரு தரப்பினரும் இணக்கம் தெரிவித்துள்ளதாக சின்ஹுவா செய்தி வெளியிட்டுள்ளது.

பூசானில் எட்டப்பட்ட வர்த்தக ஒப்பந்தம் ஆரம்பத்தில் ஒரு வருட காலத்துக்கு மட்டுமே அமுலில் இருக்கத் திட்டமிடப்பட்டிருந்தது. எனினும், கடந்த செப்டெம்பர் மாதம் ட்ரம்ப், ஷி ஜின்பிங்கை வெள்ளை மாளிகையில் வரவேற்றதைத் தொடர்ந்து, இந்த ஒப்பந்தம் எதிர்வரும் ஜனவரி 10ஆம் திகதி வரை நீடிக்கப்பட்டது.

இந்நிலையில், எதிர்வரும் நவம்பர் 18 மற்றும் 19ஆம் திகதிகளில் சீனாவின் ஷென்சென் நகரில் நடைபெறவுள்ள ஆசிய – பசுபிக் பொருளாதார ஒத்துழைப்பு மாநாட்டில் இரு நாட்டுத் தலைவர்களும் மீண்டும் சந்திப்பார்கள் என எதிர்பார்க்கப்படுகிறது.

இதற்கிடையில், இந்த மாநாட்டின் பக்க நிகழ்வாக சீன ஜனாதிபதி ஷி ஜின்பிங், அமெரிக்க ஜனாதிபதி டொனால்ட் ட்ரம்ப் மற்றும் ரஷ்ய ஜனாதிபதி விளாடிமிர் புட்டின் ஆகியோர் பங்கேற்கும் வரலாற்றுச் சிறப்புமிக்க முத்தரப்புச் சந்திப்பு தொடர்பிலும் பேச்சுவார்த்தைகள் இடம்பெற்று வருவதாக சீனா முதன்முறையாக உறுதிப்படுத்தியுள்ளது.

மூன்று நாட்டுத் தலைவர்களுக்கும் இடையிலான சந்திப்பு தொடர்பில் சம்பந்தப்பட்ட தரப்புகளுடன் தொடர்புகளைப் பேணி வருவதாக சீன வெளிவிவகார அமைச்சின் பேச்சாளர் மாவோ நிங், இந்த வாரம் பீஜிங்கில் நடைபெற்ற ஊடகவியலாளர் சந்திப்பில் தெரிவித்துள்ளார்.