பெருவில் சுற்றுலாப் பயணிகளை ஏற்றிச் சென்ற விமானம் விபத்து – 13 பேர் பலி

பெருவில் சுற்றுலாப் பயணிகளை ஏற்றிச் சென்ற சிறிய ரக விமானம் ஒன்று நேற்று விபத்தில் சிக்கியுள்ளது.

இதில் 13 பேர் உயிரிழந்துள்ளதாக அந்நாட்டு அதிகாரிகள் தெரிவித்துள்ளனர்.

செஸ்னா கேரவன் சி-208 ரகத்தைச் சேர்ந்த குறித்த விமானம் நாஸ்கா லைன்ஸ் தொல்பொருள் தளத்தின் மீது பறந்துகொண்டிருந்தபோது விபத்துக்குள்ளானது.

அதில் 11 பயணிகளும் 02 பணியாளர்களும் இருந்த நிலையில் அனைவரும் உயிரிழந்துள்ளதாக அறிவிக்கப்பட்டுள்ளது.

பயணிகளில் இரண்டு ஜெர்மனியர்கள், இரண்டு ஸ்பானியர்கள் மற்றும் ஏழு இத்தாலிய சுற்றுலாப் பயணிகள் அடங்குவதாக பெருவின் அரசு செய்தி நிறுவனம் தெரிவித்துள்ளது.

விபத்துக்கான காரணம் இன்னும் அறிவிக்கப்படவில்லை. விசாரணைகள் தொடர்வதாக தெரிவிக்கப்பட்டுள்ளது.