ஜெர்மனியில் ஆளுங்கட்சிக்கு விழுந்தது “அரசியல் பேரிடி”

ஜெர்மனியில் நடைபெற்ற பிராந்தியத் தேர்தலில் ஆளும் பழமைவாதக் கட்சி (CDU) வரலாற்றுப் பின்னடைவைச் சந்தித்ததைத் தொடர்ந்து, நாட்டின் சான்சலர் பிரீட்ரிச் மெர்ஸ் (Friedrich Merz) தனது பதவியைத் தக்கவைத்துக்கொள்ளப் போராடி வருகிறார்.

அவரது விரும்பத்தகாத பொருளாதார சீர்திருத்தங்கள் குறித்துக் கூட்டணிக் கட்சிகளுக்குள் முரண்பாடுகள் வெடித்துள்ளன.

வடகிழக்கு மாநிலமான மெக்லன்பர்க்-மேற்கு பொமரேனியாவில் (Mecklenburg-Western Pomerania) ஞாயிற்றுக்கிழமை நடைபெற்ற தேர்தலில் ஆளுங்கட்சி அடைந்த தோல்வியை “பேரழிவு” என மெர்ஸ் விவரித்துள்ளார்.

அம்மாநில வரலாற்றிலேயே முதன்முறையாக மெர்ஸின் கட்சி, நாடாளுமன்றத்திற்குள் நுழைவதற்கான குறைந்தபட்ச 5 சதவீத வாக்கு வரம்பைக்கூடப் பெறத் தவறியுள்ளது.

முன்னாள் சான்சலரும் மெர்ஸின் அரசியல் எதிரியுமான அங்கெலா மெர்க்கலின் கோட்டையாக விளங்கிய மாநிலத்திலேயே இந்தத் தோல்வி நேர்ந்துள்ளது.

இத்தேர்தலில் தீவிர வலதுசாரி ‘ஆல்டர்னேடிவ் பார் ஜெர்மனி’ (AfD) கட்சி முதலிடத்தைப் பிடித்துள்ளது.

பெரும்பான்மை கிடைக்காவிட்டாலும், ஒரே மாதத்திற்குள் இரண்டாவது மாநிலத் தேர்தலில் இக்கட்சி முதலிடத்தைப் பிடித்துள்ளது, தேசிய அளவில் அதிகாரத்தைக் கைப்பற்றுவதற்கான முக்கிய நகர்வாகப் பார்க்கப்படுகிறது.

அதேபோல, பெர்லின் மாநிலத் தேர்தலிலும் மெர்ஸின் கட்சி கணிசமான வாக்குகளை இழந்துள்ளது. அங்கு முன்னாள் கம்யூனிசக் கட்சியின் வழித்தோன்றலான தீவிர இடதுசாரி ‘டீ லிங்கே’ (Die Linke) கட்சி அதிக இடங்களைக் கைப்பற்றி ஆட்சி அமைக்கும் சூழல் உருவாகியுள்ளது.

இந்த தேர்தல் முடிவுகள் மெர்ஸின் பதவிக்கு உடனடியாக ஆபத்தை ஏற்படுத்தாவிட்டாலும், அவரது குறைந்த ஆதரவு வீதமும் தீவிர வலதுசாரிகளின் எழுச்சியும் அவரது எதிர்காலத்தைக் கேள்விக்குறியாக்கியுள்ளன.

இருப்பினும், பின்னடைவைச் சந்தித்த போதிலும், நாட்டின் மந்தமான பொருளாதார வளர்ச்சியை மீட்கத் தனது பொருளாதார சீர்திருத்தங்களைத் தொடர்ந்து முன்னெடுப்பேன் என மெர்ஸ் உறுதிபூண்டுள்ளார்.