இந்தியாவில் இருந்து இலங்கைக்கு நாடுகடத்தப்பட்ட LTTE உறுப்பினர் – தீவிர விசாரணைகள் முன்னெடுப்பு

தமிழீழ விடுதலைப்புலிகளின் உறுப்பினர் ஒருவர் இந்தியாவில் இருந்து நாடுகடத்தப்பட்டுள்ளார்.

அவரை பயங்கரவாத தடுப்பு பிரிவினர் கைது செய்து விசாரணைக்கு உட்படுத்தியுள்ளனர்.

கைது செய்யப்பட்ட சந்தேகநபர் யாழ்ப்பாணம் – சண்டிலிப்பாய் பிரதேசத்தைச் சேர்ந்த 50 வயதுடைய ஒருவர் என அடையாளம் காணப்பட்டுள்ளார்.

கடந்த 2015 ஆம் ஆண்டு விடுதலைப் புலிகள் அமைப்பை மீண்டும் மீள கட்டியெழுப்ப முயன்ற குற்றச்சாட்டில் இந்திய பாதுகாப்புப் படையினரால் இவர் கைது செய்யப்பட்டார்.

அங்கு நீதிமன்றத்தில் வழக்கு விசாரணை செய்யப்பட்டு குற்றவாளியாக நிரூபிக்கப்பட்டதை அடுத்து, அவருக்கு 10 ஆண்டுகள் சிறைத்தண்டனை விதிக்கப்பட்டது.

குறித்த சிறைத்தண்டனை நிறைவடைந்த நிலையில், அவரை இலங்கைக்கு நாடுகடத்த நடவடிக்கைகள் எடுக்கப்பட்டன.

இதற்கமைய, நேற்று (26) இரவு   கட்டுநாயக்க பண்டாரநாயக்க சர்வதேச விமான நிலையத்தை அவர் வந்தடைந்தார்.

இதன்போது, அங்கு தயார் நிலையில் இருந்த பொலிஸ் பயங்கரவாத தடுப்பு மற்றும் விசாரணைப் பிரிவினர் அவரை கைது செய்துள்ளனர்.

சந்தேகநபர் தொடர்பாக உளவுப் பிரிவினரால் வழங்கப்பட்ட தகவல்களின் அடிப்படையில் மேலதிக விசாரணைகளை முன்னெடுப்பதற்காக 72 மணிநேர தடுப்புக் காவல் உத்தரவு பெறப்பட்டுள்ளது.