கால்பந்து உலகின் காவிய நாயகனின் கடைசி ஆட்டம்

இரண்டு தசாப்தங்களுக்கும் மேலாக சர்வதேசக் கால்பந்து உலகை ஆட்டிப்படைத்த அர்ஜென்டீனா கால்பந்து அணியின் நட்சத்திர வீரர் லியோனல் மெஸ்ஸி (39), செவ்வாய்க்கிழமை (06) நடைபெறவுள்ள பெனின் (Benin) அணிக்கு எதிரான நட்புரீதியான போட்டியுடன் தனது சர்வதேசக் கால்பந்து பயணத்திற்கு முற்றுப்புள்ளி வைக்கிறார்.

புவெனஸ் அயர்ஸில் உள்ள Estadio Monumental மைதானத்தில் 85,000 பார்வையாளர்கள் முன்னிலையில் நடைபெறும் இப்போட்டியில், மெஸ்ஸி தனது வரலாற்றுச் சிறப்புமிக்க ‘அல்பிசெலெஸ்ட்’ (Albiceleste) சீருடையில் இறுதி முறையாகக் களம் இறங்குகிறார்.

மெஸ்ஸியின் வரலாற்றுச் சாதனைப் பயணம்

சாதனை நாயகன்: அர்ஜென்டீனா அணிக்காக 207 போட்டிகளில் விளையாடி 125 கோல்களையும், 68 ‘அசிஸ்ட்’களையும் (Assist) பதிவு செய்து, நாட்டின் அதிக கோல்கள் மற்றும் அதிக போட்டிகளில் விளையாடிய வீரர் என்ற சாதனைகளுடன் அவர் விடைபெறுகிறார்.

2022 உலகக்கோப்பை, இரண்டு கோபா அமெரிக்கா (Copa America) சாம்பியன் பட்டங்கள் மற்றும் பைனலிசிமா (Finalissima) ஆகிய பிரம்மாண்ட வெற்றிகளை அர்ஜென்டீனாவிற்குப் பெற்றுத் தந்த பெருமை இவருக்கு உண்டு.

“நான் எனது முழு உழைப்பையும் வழங்கிவிட்டேன். இனி வழங்குவதற்கு எதுவும் இல்லை; வாய்ப்பிற்காகக் காத்திருக்கும் திறமையான இளம் வீரர்களுக்கு இதுவே சரியான தருணம்” என கடந்த ஆகஸ்ட் மாதம் மெஸ்ஸி தனது ஓய்வு முடிவை அறிவித்திருந்தார்.

இப்போட்டியில் 2022 உலகக்கோப்பை வென்ற ஏஞ்சல் டி மரியா (Angel Di Maria) உள்ளிட்ட மூத்த வீரர்களும், மெஸ்ஸியின் குடும்பத்தினரும் கலந்துகொண்டு அவருக்கு கௌரவம் அளிக்கவுள்ளனர்.

மெஸ்ஸிக்கு அடுத்தபடியாக அர்ஜென்டீனா அணியின் புதிய தலைவராக (Captain) மையப் தற்காப்பு ஆட்டக்காரர் கிறிஸ்டியன் ரொமேரோ (Cristian Romero) பொறுப்பேற்பார் என எதிர்பார்க்கப்படுகிறது.

மெஸ்ஸியுடன் சேர்ந்து 38 வயதான துணைத் தலைவர் நிக்கோலஸ் ஒட்டமெண்டியும் (Nicolas Otamendi) சர்வதேசப் போட்டிகளிலிருந்து விடைபெறுகிறார். உலகின் மிகச்சிறந்த கால்பந்து வீரராகக் கருதப்படும் மெஸ்ஸியின் இந்த விடைபெறல், அர்ஜென்டீனக் கால்பந்தின் பொற்காலத்தின் ஒரு அத்தியாயத்தை நிறைவு செய்து, புதிய தலைமுறையின் தொடக்கத்தைக் குறிக்கிறது.