ஈரான் ஒப்பந்தம் ஒன்றை செய்ய கெஞ்சுகிறது: மார்கோ ரூபியோ

அமெரிக்க வெளியுறவுத்துறை செயலர் மார்கோ ரூபியோ, ஈரானுக்குக் கடுமையான எச்சரிக்கை விடுத்துள்ளார்.

தெஹ்ரான் தனது நடத்தையை மாற்றிக்கொள்ளாவிட்டால், ஒவ்வொரு இரவும் அது கடுமையான விலையைக் கொடுக்க நேரிடும் என்று அவர் கூறியுள்ளார்.

பிலிப்பைன்ஸ் தலைநகர் மணிலாவில் நடைபெற்ற ஆசியான் மாநாட்டின் இடையே செய்தியாளர்களிடம் பேசிய மார்கோ ரூபியோ இதனை தெரிவித்துள்ளார்.

ஈரான் தன் உணர்வுக்குத் திரும்பும் வரை, ஒவ்வொரு இரவும் அது அதிக விலையைக் கொடுக்கும் என்று கூறினார்.

ஈரான் ஒரு ஒப்பந்தம் செய்ய கெஞ்சுகிறது, ஆனால் அது இன்னும் எந்த உடன்பாட்டிற்கும் தயாராக இருப்பதாகத் தெரியவில்லை.

ஒருவேளை அது ஒப்பந்தம் செய்யாவிட்டால், அதற்கான விலையை அது கொடுக்க வேண்டியிருக்கும் என்றும் அவர் கூறினார்.

ஈரான் எப்போதெல்லாம் ஒரு ஒப்பந்தம் செய்கிறதோ, அப்போதெல்லாம் ஒன்று அதை மீறுகிறது அல்லது அதன் விதிமுறைகளை மாற்றுகிறது என்று ரூபியோ குற்றம் சாட்டினார்.

ஏமனில் நிலவும் சூழல் குறித்துப் பேசிய அமெரிக்க வெளியுறவுத்துறை அமைச்சர், ஹூதிகள் ஈரானால் தவறாக வழிநடத்தப்பட்டுள்ளதாகவும், ஹூதி கிளர்ச்சியாளர்கள் பதற்றத்தைக் குறைப்பார்கள் என நம்பப்படுவதாகவும் தெரிவித்தார்.

சவூதி அரேபியா ஒரு முக்கியமான மூலோபாய கூட்டாளி என்றும், அதனுடன் அணுசக்தி ஒப்பந்தம் செய்துகொள்வது பொருத்தமானது என்றும் அவர் கூறினார்.

சவூதி அரேபியா அல்லது பிற நாடுகளுடனான எந்தவொரு அணுசக்தி ஒப்பந்தமும் பாதுகாப்பு அம்சங்களை உள்ளடக்கியிருக்கும், மேலும் அணுசக்தி ஒப்பந்தங்கள் நாடாளுமன்றத்தின் ஒப்புதலுக்கு உட்பட்டவை.

ஆசியக் கடற்பரப்பில் சீனாவின் நடவடிக்கைகள் கவலையளிப்பதாகவும், தனது ரஷ்யப் பிரதிநிதியுடன் நல்ல மற்றும் வெளிப்படையான கலந்துரையாடல்களை நடத்தியதாகவும், போரை முடிவுக்குக் கொண்டுவருவதில் ஆக்கப்பூர்வமான பங்கை ஆற்ற உக்ரைன் தயாராக இருப்பதாகவும் மார்கோ ரூபியோ கூறுகிறார்.