அமெரிக்க இடைத்தேர்தல் முடிவு குறித்து இந்தியா கழுகுப்பார்வை

அமெரிக்காவில் எதிர்வரும் நவம்பர் 3ஆம் திகதி நடைபெறவுள்ள இடைக்காலத் தேர்தல், ஜனாதிபதி டொனால்ட் ட்ரம்பின் நிர்வாகத்துக்கு மட்டுமன்றி, இந்தியா – அமெரிக்க உறவுகளுக்கும் முக்கியத்துவம் வாய்ந்ததாகக் கருதப்படுகிறது.

ஜனநாயகக் கட்சி (Democrats) வெற்றி பெற்று நாடாளுமன்றத்தின் கட்டுப்பாட்டைக் கைப்பற்றுமா, குடியரசுக் கட்சி (Republicans) தனது ஆதிக்கத்தைத் தக்கவைக்குமா அல்லது இரு கட்சிகளுக்கும் இடையில் அதிகாரம் பிளவுபடுமா என்ற எதிர்பார்ப்பு நிலவுகிறது.

இந்தத் தேர்தல் முடிவுகள் அமெரிக்காவின் உள்நாட்டு அரசியலில் மாற்றங்களை ஏற்படுத்துவதுடன், வர்த்தகம், குடியேற்றக் கொள்கை, பாதுகாப்பு ஒத்துழைப்பு மற்றும் வெளிநாட்டுக் கொள்கை உள்ளிட்ட துறைகளிலும் தாக்கத்தை ஏற்படுத்தக்கூடும்.

இந்தியாவுக்கு ஏன் முக்கியம்?

அமெரிக்காவின் வர்த்தக வரிக் கொள்கைகள் இந்திய ஏற்றுமதியாளர்களுக்கு நிச்சயமற்ற சூழலை ஏற்படுத்தியுள்ளன. குறிப்பாக, ஆடைத் தொழில், மருந்துப் பொருள் உற்பத்தி, பொறியியல் மற்றும் உற்பத்தித் துறைகள் இதனால் பாதிக்கப்படக்கூடிய நிலை காணப்படுகிறது.

ஜனநாயகக் கட்சி நாடாளுமன்றத்தின் ஏதேனும் ஓர் அவையைக் கைப்பற்றினால், ட்ரம்ப் நிர்வாகத்தின் வர்த்தகக் கொள்கைகள் குறித்து அதிக கண்காணிப்பும் விசாரணைகளும் முன்னெடுக்கப்படலாம். எனினும், நாடாளுமன்றத்தில் அதிகார மாற்றம் ஏற்பட்டவுடன் அமெரிக்காவின் வர்த்தக வரிகள் தானாகவே நீக்கப்படும் எனக் கருத முடியாது.

இந்தியத் தொழில்நுட்பத் துறையும் H-1B விசாவும்

அமெரிக்காவில் பணியாற்றும் இந்தியத் தொழில்நுட்ப வல்லுநர்களுக்கும், அமெரிக்காவுக்கு ஊழியர்களை அனுப்பும் இந்தியத் தகவல் தொழில்நுட்ப நிறுவனங்களுக்கும் H-1B விசா திட்டம் முக்கியத்துவம் வாய்ந்ததாகும்.

இந்த விசா நடைமுறைகளில் ட்ரம்ப் நிர்வாகம் மேற்கொண்டுள்ள கட்டுப்பாடுகள் இந்தியத் தொழில்நுட்பத் துறையில் கவலைகளை ஏற்படுத்தியுள்ளன.

ஜனநாயகக் கட்சியினர் நாடாளுமன்றத்தில் அதிக செல்வாக்கைப் பெற்றால், குடியேற்றக் கொள்கைகள் தொடர்பாக நிர்வாகத்தின் மீது கூடுதல் அழுத்தம் கொடுக்க முடியும். இருப்பினும், தேர்தல் முடிவு மாத்திரம் விசா விதிமுறைகளை உடனடியாக மாற்றிவிடாது.

பாதுகாப்பு மற்றும் தொழில்நுட்ப ஒத்துழைப்பு

இந்தியா – அமெரிக்க உறவில் பாதுகாப்பு, செயற்கை நுண்ணறிவு, குறைக்கடத்தி உற்பத்தி, முக்கிய கனிமங்கள் மற்றும் வளர்ந்து வரும் தொழில்நுட்பங்கள் தொடர்பான ஒத்துழைப்பும் முக்கிய இடத்தைப் பெற்றுள்ளது.

அமெரிக்க நாடாளுமன்றத்தில் ஏற்படும் அதிகார மாற்றம், இத்துறைகளுக்கான நிதி ஒதுக்கீடுகள், திட்டங்களின் கண்காணிப்பு மற்றும் அவற்றைச் செயல்படுத்தும் வேகம் ஆகியவற்றில் தாக்கத்தை ஏற்படுத்தக்கூடும்.

எனினும், இந்தியா – அமெரிக்க மூலோபாய உறவு ஒரு கட்சியின் அரசியல் நிலைப்பாட்டை மாத்திரம் சார்ந்ததல்ல. இரு கட்சிகளிலும் இந்த உறவுக்கு ஆதரவு காணப்படுவதால், தேர்தல் முடிவுகள் ஒத்துழைப்பை முழுமையாக மாற்றிவிடும் எனக் கூற முடியாது.

இந்தியாவின் இராஜதந்திரச் சவால்

ரஷ்யாவிடமிருந்து இந்தியா கொள்வனவு செய்யும் எண்ணெய், அமெரிக்காவின் வர்த்தக வரிக் கொள்கைகள், பாகிஸ்தானுடனான வாஷிங்டனின் உறவு மற்றும் இந்தியக் குடியேற்றவாசிகள் தொடர்பான கொள்கைகள் ஆகியவை இரு நாடுகளுக்கும் இடையில் கருத்து வேறுபாடுகளை ஏற்படுத்தியுள்ளன.

இந்த நிலையில், அமெரிக்காவின் எந்தக் கட்சி ஆட்சியில் இருந்தாலும் இந்தியாவின் தேசிய நலன்களைப் பாதுகாக்கும் வகையில் இராஜதந்திர உறவுகளைப் பேண வேண்டிய சவாலை புதுடெல்லி எதிர்கொள்கிறது.

ஜனநாயகக் கட்சி நாடாளுமன்றத்தில் ஆதிக்கம் செலுத்தினால், ட்ரம்ப் நிர்வாகத்தின் சில முடிவுகள் மீது கூடுதல் கண்காணிப்பு ஏற்படலாம். அதேவேளை, குடியரசுக் கட்சி தனது கட்டுப்பாட்டைத் தக்கவைத்தால், தற்போதைய நிர்வாகத்தின் கொள்கைகளைத் தொடர்ந்து முன்னெடுப்பதற்கு அதிக அரசியல் இடவசதி கிடைக்கலாம்.

எனினும், எந்தவொரு தேர்தல் முடிவும் இந்தியாவுக்கு சாதகமான கொள்கை மாற்றத்தை உறுதிப்படுத்தாது. அமெரிக்காவுடனான உறவைப் பேணிக்கொண்டே, ரஷ்யா உள்ளிட்ட ஏனைய நாடுகளுடனான உறவுகளிலும் தனது சுயாதீனமான வெளியுறவுக் கொள்கையைத் தொடர்வதே இந்தியாவின் முக்கிய இராஜதந்திரச் சவாலாக உள்ளது.

எனவே, அமெரிக்க இடைக்காலத் தேர்தல் முடிவுகளை எதிர்கொள்வதற்கான இந்தியாவின் அணுகுமுறை, ஆட்சியில் இருக்கும் கட்சியுடன் மாத்திரமன்றி, அமெரிக்க நாடாளுமன்றம் மற்றும் முக்கிய அரச நிறுவனங்களுடனான உறவுகளையும் வலுப்படுத்துவதாக அமைய வேண்டியுள்ளது.