இலங்கை அணியின் துடுப்பாட்டப் பயிற்றுவிப்பாளராக ஹஷான் திலகரத்ன நியமனம்

இலங்கை ஆண்கள் கிரிக்கெட் அணியின் (Senior Men’s Program) துடுப்பாட்டப் பயிற்றுவிப்பாளராக ( ) முன்னாள் வீரர் ஹஷான் திலகரத்ன நியமிக்கப்பட்டுள்ளதாக இலங்கை கிரிக்கெட் சபை (SLC) அறிவித்துள்ளது.

இலங்கை கிரிக்கெட் சபையின் தேசிய உயர் செயல்திறன் மையத்தில் (National High Performance Center) தங்கியிருந்து செயல்படவுள்ள அவர், மூத்த பிரிவின் ஒரு அங்கமாக தேசிய அணி வீரர்களுடன் இணைந்து பணியாற்றவுள்ளார்.

1996 ஆம் ஆண்டு உலகக் கோப்பையை வென்ற இலங்கை அணியில் இடம்பெற்றிருந்த இவர், முன்னர் இலங்கை ஆண்கள் தேசிய அணியின் துடுப்பாட்டப் பயிற்றுவிப்பாளராகவும், இலங்கை பெண்கள் தேசிய அணியின் தலைமைப் பயிற்றுவிப்பாளராகவும் பணியாற்றியுள்ளார்.

மேலும், பங்களாதேஷ் பெண்கள் தேசிய அணியின் தலைமைப் பயிற்றுவிப்பாளராகவும் இவர் கடமையாற்றியுள்ளார் என்பது குறிப்பிடத்தக்கது.

1989 முதல் 2003 வரை இலங்கை அணிக்காக விளையாடிய ஹஷான் திலகரத்ன, 83 தேர்வுப் (Test) போட்டிகளிலும் 200 சர்வதேச ஒருநாள் (ODI) போட்டிகளிலும் பங்கேற்று, இரு வடிவங்களிலும் சேர்த்து 8,200க்கும் மேற்பட்ட சர்வதேச ஓட்டங்களைக் குவித்துள்ளார்.

இவரது இந்த நியமனமானது ஆகஸ்ட் 20, 2026 முதல் நடைமுறைக்கு வந்துள்ளதோடு, டிசம்பர் 31, 2027 வரை தொடரும் என அறிவிக்கப்பட்டுள்ளது.