ஆந்திராவில் பரபரப்பை ஏற்படுத்தியுள்ள அசாம் யுவதியின் மரணம்
நடனக் குழுவின் ஒரு பகுதியாக ஆந்திரப் பிரதேசத்தின் விசாகப்பட்டினத்திற்குப் பயணம் செய்த அசாமைச் சேர்ந்த 20 வயது இளம் பெண் நடனக் கலைஞர், ரயில்வே தண்டவாளம் அருகே சடலமாக மீட்கப்பட்டுள்ள சம்பவம் பெரும் பரபரப்பை ஏற்படுத்தியுள்ளது.
அசாம் மாநிலத்தைச் சேர்ந்த ஹிமாஸ்ரீ போரோ (Himashree Boro) என்ற அந்தப் பெண், விவேக் எக்ஸ்பிரஸ் (Vivek Express) ரயிலில் மீண்டும் அஸ்ஸாம் திரும்பிக் கொண்டிருந்தபோது மாயமானார்.
பின்னர், ஆந்திரப் பிரதேசத்தின் ஸ்ரீகாகுளம் மாவட்டத்தில் உள்ள ரயில்வே தண்டவாளத்திற்கு அருகில் அவர் சடலமாகக் கண்டெடுக்கப்பட்டார்.
ரயிலில் பயணம் செய்தபோது, “என்னைச் சுற்றி நிறைய ஆண்கள் இருக்கிறார்கள், எனக்குப் பயமாக இருக்கிறது” என்றும், சிலர் தன்னிடம் தவறாக நடந்துகொள்ள முயல்வதாகவும் தனது குடும்பத்தினருக்கு அவர் குறுஞ்செய்தி அனுப்பியுள்ளார்.
மேலும், அவர் அனுப்பிய வீடியோ ஒன்றில் பல ஆண்கள் அவரைச் சுற்றி இருப்பது போன்று பதிவாகியுள்ளது.
ரயில் கவுகாத்தியை அடைந்தபோது, அவரது எஸ்-2 (S-2) பெட்டியில் அவரது இரு பைகளும் அடையாள ஆவணங்களும் அப்படியே இருந்தன; ஆனால் ஹிமாஸ்ரீ அங்கு இல்லை.
விசாகப்பட்டினம் ரயில் நிலையத்தில் அவர் ரயிலில் ஏறுவதற்கு முன், அடையாளம் தெரியாத நபர் ஒருவர் அவரிடம் பேசுவது போன்ற கண்காணிப்புக் கேமரா (CCTV) காட்சிகள் வெளியாகி பரிசீலிக்கப்பட்டு வருகின்றன.
குடும்பத்தினர் இது கொலை எனச் சந்தேகிக்கின்றனர். ரயில்வே காவல்துறை (GRP) மற்றும் ஸ்ரீகாகுளம் மாவட்டக் காவல்துறை இணைந்து தீவிர விசாரணை நடத்தி வருகின்றனர்.
கூட்ட நெரிசல் மிகுந்த பெட்டியிலிருந்து அவர் தவறி விழுந்தாரா அல்லது யாரேனும் அவரைத் தள்ளிவிட்டனரா என்ற கோணத்திலும், சந்தேகத்திற்கிடமான மரணம் என்ற பிரிவின் கீழும் வழக்குப்பதிவு செய்து விசாரணை மேற்கொண்டு வருகின்றனர்.
