இந்தியா அசாமில் கோர விபத்து: 23 பேர் பலி

இந்தியாவின் அசாம் மாநிலத்தில் காசிரங்கா பகுதியில் பேருந்து ஒன்றும் லொறி ஒன்றும் நேருக்கு நேர் மோதியதில் குறைந்தது 23 பேர் உயிரிழந்துள்ளதுடன், மேலும் 7 பேர் காயமடைந்துள்ளனர்.

இந்த விபத்து வியாழக்கிழமை (12) காசிரங்காவுக்கு அருகிலுள்ள ரோங்காஜான் பகுதியில் இடம்பெற்றுள்ளது. இன்றைய தினமே இது பற்றிய தகவல்கள் வெளியாகியுள்ளன.

போகாகாட்டிலிருந்து நாகோன் நோக்கிப் பயணித்த சிறிய பயணிகள் பேருந்து ஒன்றின் மீது எதிர்த் திசையில் வந்த லொறி மோதியதில் இந்த விபத்து நேர்ந்துள்ளது.

மோதலின் தாக்கத்தால் பேருந்து பலத்த சேதமடைந்ததுடன், அதில் பயணித்த பலர் இடிபாடுகளுக்குள் சிக்கியுள்ளனர்.

இதனையடுத்து பொலிஸாரும் பிரதேச மக்களும் இணைந்து மீட்புப் பணிகளில் ஈடுபட்டுள்ளனர்.

காயமடைந்தவர்கள் கோஹோரா மாதிரி வைத்தியசாலைக்கு கொண்டு செல்லப்பட்டுள்ளனர். அவர்களில் சிலரது நிலைமை கவலைக்கிடமாக உள்ளதாகத் தெரிவிக்கப்படுகிறது.

இதனால் உயிரிழப்புகளின் எண்ணிக்கை மேலும் அதிகரிக்கக்கூடும் என அஞ்சப்படுகிறது.

இந்த விபத்து தொடர்பான மேலதிக விசாரணைகளை பொலிஸார் முன்னெடுத்து வருகின்றனர்