விஜய்யின் பிறந்தநாள் பரிசு ‘ஜனநாயகன்’

தமிழக முதல்வர் விஜய்யின் பிறந்தநாளான ஜூன் 22-க்கு முன்பாக, ஜூன் 19 அல்லது 20-ஆம் திகதி ‘ஜனநாயகன்’ திரைப்படம் , திரையிடப்படக்கூடும் என தகவல் வெளியாகியுள்ளது.

அரசியலுக்கு வருவதற்கு முன்னர் விஜய் நடித்த, கடைசி படம் இதுவாகும்.

நடிகர் விஜய் நடித்துள்ள ஜனநாயகன் திரைப்படம் கடந்த ஜனவரி 9-ஆம் திகதி வெளியாகும் என எதிர்பார்க்கப்பட்டது.

எனினும், தணிக்கை (Censor) தொடர்பான சிக்கல்கள் மற்றும் சென்சார் சான்றிதழ் வழங்கப்படாததால் படத்தின் வெளியீடு ஒத்திவைக்கப்பட்டது.

இதையடுத்து, படத் தயாரிப்பு நிறுவனமான KVN Productions சென்சார் சான்றிதழ் கோரி, கடிதம் அனுப்பி இருந்தது.

சென்சார் போர்டு பரிந்துரைத்த மாற்றங்களைச் செய்ய படக்குழு ஒப்புக்கொண்டுள்ளதாகவும், படத்தின் சர்ச்சைக்குரிய சில காட்சிகள் நீக்கப்பட்டு நீளம் குறைக்கப்பட்டுள்ளதாகவும் தகவல்கள் வெளியாகின.

இந்நிலையில் தற்போது நிலவி வந்த தடைகள் அனைத்தும் விலகி, நடிகர் விஜய்யின் பிறந்தநாளான ஜூன் 22-க்கு முன்பாக, ஜூன் 19 அல்லது ஜூன் 20-ஆம் திகதி ‘ஜனநாயகன்’ திரைப்படம் திரையரங்குகளில் ரிலீஸ் ஆக அதிக வாய்ப்புள்ளதாகப் புதிய தகவல்கள் வெளியாகியுள்ளன.

நீண்ட நாட்களாகத் தங்களின் ‘தளபதி’ படத்தின் அதிகாரப்பூர்வ ரிலீஸ் திகதிக்காக காத்துக்கொண்டிருந்த விஜய் ரசிகர்கள், இந்தத் தகவலால் மிகுந்த உற்சாகமடைந்து சமூக வலைத்தளங்களில் இதனைக் கொண்டாடி வருகின்றனர்.