யேமனில் மோதல்: 2.8 இலட்சத்துக்கும் அதிகமானோர் இடம்பெயர்வு – ஐ.நா.

யேமனில் மீண்டும் தீவிரமடைந்துள்ள மோதல்கள் காரணமாக, ஓகஸ்ட் மாத ஆரம்பம் முதல் 281,000-க்கும் அதிகமானோர் தங்களது வீடுகளை விட்டு வெளியேறியுள்ளதாக ஐக்கிய நாடுகள் சபையின் மனிதாபிமான விவகாரங்களுக்கான ஒருங்கிணைப்பு அலுவலகம் (OCHA) தெரிவித்துள்ளது.

சர்வதேச அங்கீகாரம் பெற்ற அரசாங்கத்துக்கு ஆதரவான படைகளுக்கும் ஹூதி கிளர்ச்சியாளர்களுக்கும் இடையில் மீண்டும் மோதல்கள் வெடித்துள்ள நிலையில், இந்த இடம்பெயர்வு ஏற்பட்டுள்ளது.

கடந்த மூன்று வாரங்களாக, மனிதாபிமான உதவிகளை மக்களிடம் கொண்டு சேர்ப்பதில் அதிகரித்த சிரமங்கள் நிலவுவதாக OCHA தெரிவித்துள்ளது. தாயிஸ் நகரை தென்பகுதி ஆளுநர் பிரிவுகளுடன் இணைக்கும் முக்கிய வீதிக்கு ஏற்பட்டுள்ள சேதமே இதற்குக் காரணமாகும்.

இதனால், உதவி தேவைப்படும் மக்களுக்கான நிவாரணப் பொருட்களை குறுகிய மலைப்பாதைகள் வழியாகக் கொண்டு செல்ல வேண்டிய நிலை ஏற்பட்டுள்ளது.

பொதுமக்கள் மற்றும் நிவாரணப் பொருட்களைக் கொண்டு செல்லும் வாகனங்கள் மீது தாக்குதல் நடத்துவதைத் தவிர்க்குமாறு மோதலில் ஈடுபட்டுள்ள தரப்பினரிடம் OCHA வலியுறுத்தியுள்ளது.

“அனைத்துத் தரப்பினரும் சர்வதேச மனிதாபிமானச் சட்டத்தை மதிக்க வேண்டும். மேலும், உதவி தேவைப்படும் மக்களுக்கு நிவாரணங்கள் சென்றடைவதை உறுதிப்படுத்தும் வகையில், பாதுகாப்பான, தொடர்ச்சியான மற்றும் தடையற்ற மனிதாபிமான உதவிப் போக்குவரத்துக்கு அனுமதியளிக்க வேண்டும்” என அந்த அலுவலகம் தெரிவித்துள்ளது.