பிரபாகரனின் வீட்டில் இருந்து மண்ணை எடுத்துச்சென்ற தொல்.திருமாவளவன்
சிரேஷ்ட அரசியல்வாதி எம்.கே.சிவாஜிலிங்கத்தின் இறுதி நிகழ்வில் கலந்துகொள்வதற்காக யாழ்ப்பாணத்துக்கு வருகை தந்திருந்த இந்திய நாடாளுமன்ற உறுப்பினரும், விடுதலைச் சிறுத்தைகள் கட்சியின் தலைவருமான தொல்.திருமாவளவன், வல்வெட்டித்துறையில் அமைந்துள்ள தமிழீழ விடுதலைப் புலிகளின் தலைவர் வேலுப்பிள்ளை பிரபாகரனின் இல்லம் அமைந்திருந்த பகுதியை நேற்று நேரில் பார்வையிட்டார்.
அத்துடன், அங்கிருந்த மண்ணையும் அவர் நினைவுச் சின்னமாக எடுத்துச் சென்றார்.
வல்வெட்டித்துறை – ஆலடிப் பகுதியில் அமைந்திருந்த தலைவர் பிரபாகரனின் இல்லம் முற்றாக இடித்துத் தரைமட்டமாக்கப்பட்டுள்ள நிலையில், தற்போது அந்தப் பகுதி வெறும் காணியாகவே காணப்படுகின்றது.
இந்தப் பகுதியில்தான் தலைவர் பிரபாகரனின் பிறந்த தினமான நவம்பர் 26ஆம் திகதி, மறைந்த முன்னாள் நாடாளுமன்ற உறுப்பினர் எம்.கே.சிவாஜிலிங்கம் வருடாந்தம் கேக் வெட்டிப் பிறந்த தினத்தைக் கொண்டாடுவது வழக்கமாக இருந்தமை குறிப்பிடத்தக்கது.




