நியூசிலாந்து நாடாளுமன்றம் கலைப்பு: நவம்பர் 07 தேர்தல்

அடுத்த மாதம் நடைபெறவுள்ள தேசிய தேர்தலுக்கான அதிகாரப்பூர்வ பிரச்சாரங்கள் தொடங்குவதைக் குறிக்கும் வகையில், நியூசிலாந்து நாடாளுமன்றம் வியாழக்கிழமை கலைக்கப்பட்டது.

இத்தேர்தலில் ஆளுங்கட்சியான மைய-வலதுசாரிக் கூட்டணிக்கும், தொழிலாளர் கட்சி (Labour) தலைமையிலான இடதுசாரி கூட்டணிக்கும் இடையே கடும் போட்டி நிலவும் என எதிர்பார்க்கப்படுகிறது.

நவம்பர் 7-ஆம் திகதி நடைபெறவுள்ள வாக்களிப்பிற்கு முன்னதாக, நாடாளுமன்றத்தின் இறுதி அமர்வு செப்டம்பர் 23 அன்று நடைபெற்றது.

இதில் அரசியல் கட்சிகள் நாட்டின் வாழ்க்கைச் செலவினங்கள், பொருளாதார மேலாண்மை மற்றும் பொதுச் சேவைகள் ஆகியவற்றின் மீது முக்கிய கவனம் செலுத்தின.

வாக்காளர்களிடையே பெரும் எதிர்பார்ப்பை ஏற்படுத்தியுள்ள ‘1News-Verian’ கருத்துக் கணிப்பின்படி, தொழிலாளர் கட்சி தலைமையிலான இடதுசாரி கூட்டணி 65 இடங்களைக் கைப்பற்றி ஆட்சியமைக்க வாய்ப்புள்ளதாகத் தெரிகிறது.

அதேவேளையில், தற்போதைய ஆளுங்கட்சியான நேஷனல், ஏசிடி (ACT) மற்றும் நியூசிலாந்து பர்ஸ்ட் ஆகிய கட்சிகளின் கூட்டணி 59 இடங்களை மட்டுமே பெறக்கூடும் எனக் குறிப்பிடப்பட்டுள்ளது.

நியூசிலாந்தில் ஜெர்மன் முறையைப் போன்ற “கலப்பு உறுப்பினர் விகிதாச்சார” (MMP) தேர்தல் முறை அறிமுகப்படுத்தப்பட்டு மூன்று தசாப்தங்கள் ஆகின்றன.

இம்முறையின் காரணமாக, அங்கு கூட்டணி ஆட்சிகளே இயல்பான ஒன்றாக மாறியுள்ளதுடன், ஆட்சியமைப்பதில் சிறிய கட்சிகளின் பங்களிப்பும் தீர்மானமிக்கதாக உருவெடுத்துள்ளது.

நியூசிலாந்து நாடாளுமன்றத்தில் வழக்கமாக 120 இடங்கள் இருக்கும். இருப்பினும், ஒரு கட்சி தனது நாடு தழுவிய கட்சி வாக்கின் பங்கீட்டை விட அதிக தொகுதிகளில் வெற்றி பெறும்போது, கூடுதல் இடங்கள் சேர்க்கப்பட வாய்ப்புள்ளது.

சில கருத்துக் கணிப்புகளின்படி, ஒரு தசாப்த கால பழமையான மையவாத Opportunity Party த்தேர்தலில் ஆட்சியமைப்பதைத் தீர்மானிக்கும் முக்கிய சக்தியாக உருவெடுக்கக்கூடும் எனத் தெரியவருகிறது.