முடிவுக்கு வருகிறது நெதன்யாகு ஆட்சி: இஸ்ரேலில் நடக்கப்போவது என்ன?

இஸ்ரேலின் அடுத்த அரசாங்கத்தை அமைப்பதற்கான வாய்ப்பை வழங்கும் பிரதமர் வேட்பாளரை எதிர்வரும் ஞாயிற்றுக்கிழமைக்குள் அறிவிக்கவுள்ளதாக அந்நாட்டு ஜனாதிபதி ஐசக் ஹெர்சாக் தெரிவித்துள்ளார்.

பிரதமர் பெஞ்சமின் நெதன்யாகுவை விட எதிர்க்கட்சித் தலைவர் காடி ஐசன்கோட்டுக்கு அதிக நாடாளுமன்ற உறுப்பினர்கள் ஆதரவு தெரிவித்துள்ள நிலையில், ஜனாதிபதி இந்த அறிவிப்பை வெளியிட்டுள்ளார்.

120 உறுப்பினர்களைக் கொண்ட இஸ்ரேல் நாடாளுமன்றத்தில் (க்னெசெட்), முன்னாள் இராணுவத் தளபதியான காடி ஐசன்கோட்டுக்கு 67 உறுப்பினர்களும், நெதன்யாகுவுக்கு 46 உறுப்பினர்களும் ஆதரவு தெரிவித்துள்ளனர்.

கட்சிகளுடன் நீண்ட நேரம் கலந்துரையாடிய பின்னர் வியாழக்கிழமை கருத்துத் தெரிவித்த ஜனாதிபதி ஹெர்சாக், ஆதரவு எண்ணிக்கை தெளிவாகத் தெரிந்தாலும், அரசியல் கூட்டணிகளுக்குள்ளும் அவற்றுக்கு இடையிலும் நிலவும் முரண்பாடுகள் காரணமாக அரசாங்கத்தை அமைப்பதற்கான வாய்ப்பு யாருக்கு அதிகம் என்பதைத் தீர்மானிப்பது சவாலாக உள்ளதாகக் குறிப்பிட்டார்.

எனவே, வெள்ளி மற்றும் சனிக்கிழமைகளில் சில கட்சித் தலைவர்களுடன் தனிப்பட்ட கலந்துரையாடல்களை நடத்திவிட்டு, ஞாயிற்றுக்கிழமை பிரதமர் வேட்பாளரை அறிவிக்கவுள்ளதாகவும் தெரிவித்தார்.

கடந்த ஒக்டோபர் 27ஆம் திகதி நடைபெற்ற இஸ்ரேல் தேர்தலில் எந்தவொரு தரப்புக்கும் தெளிவான பெரும்பான்மை கிடைக்கவில்லை.

நெதன்யாகுவின் லிகுட் கட்சி 27 ஆசனங்களைப் பெற்று தனிப்பெரும் கட்சியாக உருவெடுத்தது. எனினும், அவரது மதவாத மற்றும் தேசியவாதக் கூட்டணிக்கு மொத்தமாக 53 ஆசனங்களே கிடைத்தன.

மறுபுறம், மத்திய இடதுசாரி முதல் வலதுசாரி வரையிலான கொள்கைகளைக் கொண்ட நான்கு யூதக் கட்சிகளின் கூட்டணி 48 ஆசனங்களைப் பெற்றது. இஸ்ரேலின் பாலஸ்தீனிய சிறுபான்மையினரைப் பிரதிநிதித்துவப்படுத்தும் இரு கட்சிகளும் வரலாற்றில் முன்னெப்போதும் இல்லாத வகையில் 19 ஆசனங்களைக் கைப்பற்றின.

எனினும், ஐசன்கோட்டும் நெதன்யாகுவும் அரபுக் கட்சிகளுடன் இணைந்து அரசாங்கம் அமைக்கப்போவதில்லை என அறிவித்துள்ளனர். இருந்தபோதிலும், அந்த இரு கட்சிகளும் ஐசன்கோட்டுக்கு ஆதரவு தெரிவித்துள்ளன.

இதற்கிடையில், நெதன்யாகுவின் நீண்டகாலக் கூட்டணிக் கட்சியான ஐக்கிய தோரா யூத மதக் கட்சி, எந்தவொரு பிரதமர் வேட்பாளருக்கும் ஆதரவு வழங்கப் போவதில்லை என அறிவித்துள்ளது.

அதிதீவிர யூத மதக் குழுக்களைச் சேர்ந்த ஆண்களுக்கு இராணுவச் சேவையிலிருந்து விலக்களிக்கும் சட்டத்தை நெதன்யாகுவின் கூட்டணி நிறைவேற்றத் தவறியதே இந்த முடிவுக்குக் காரணம் எனத் தெரிவிக்கப்படுகிறது.

ஐசன்கோட்டின் கூட்டணியில் இடம்பெற்றுள்ள ஜனநாயகக் கட்சியின் உறுப்பினர் யாரிவ் ஒப்பன்ஹைமர் கருத்துத் தெரிவிக்கையில், ஞாயிற்றுக்கிழமை ஐசன்கோட்டை ஜனாதிபதி தெரிவு செய்யாமல் இருப்பதற்கு எந்தக் காரணமும் இல்லை எனக் குறிப்பிட்டுள்ளார்.

ஐசன்கோட்டுக்கு அரசாங்கம் அமைப்பதற்குத் தேவையான ஆதரவைப் பெற்றுக்கொள்ளும் வாய்ப்பு இருப்பதாகவும் அவர் தெரிவித்துள்ளார்.

ஜனாதிபதியால் பிரதமர் வேட்பாளராகப் பெயரிடப்படும் நபருக்கு அரசாங்கத்தை அமைப்பதற்காக 28 நாட்கள் அவகாசம் வழங்கப்படும். தேவைப்பட்டால் மேலும் 14 நாட்கள் நீடிக்க முடியும்.

அந்தக் காலப்பகுதியில் புதிய கூட்டணி அமைக்கப்படும் வரை நெதன்யாகு காபந்து அரசாங்கத்தின் பிரதமராகத் தொடர்வார். எந்தவொரு வேட்பாளராலும் அரசாங்கத்தை அமைக்க முடியாவிட்டால் மீண்டும் தேர்தல் நடத்தப்பட வேண்டிய நிலை ஏற்படும்.

இதற்கிடையில், தேர்தலில் வாக்கு மோசடி இடம்பெற்றிருக்கலாம் எனத் தேர்தல் அதிகாரிகள் விசாரணை நடத்தி வருவதைச் சுட்டிக்காட்டிய நெதன்யாகு, தேர்தல் முடிவுகள் குறித்து சந்தேகங்களை எழுப்பியுள்ளார். அரபுக் கட்சிகள் வாக்குகளைத் திருடியதாகவும் அவர் குற்றஞ்சாட்டியுள்ளார்.

எனினும், தேர்தலின் நம்பகத்தன்மை பாதிக்கப்படவில்லை என இஸ்ரேல் மத்திய தேர்தல் குழு புதன்கிழமை தெரிவித்துள்ளது.

ஜனநாயகத்தின் அடிப்படைகளில் ஒன்று அமைதியான முறையில் அதிகாரத்தைப் பரிமாறிக்கொள்வதாகும் எனத் தெரிவித்த தேர்தல் குழுவின் தலைவர், உச்சநீதிமன்ற நீதிபதி நோம் சோல்பேர்க், தேர்தல் முடிவுகள் தொடர்பில் பொதுமக்களின் நம்பிக்கையைப் பாதுகாக்குமாறு அரசியல் தலைவர்களிடம் வலியுறுத்தியுள்ளார்.

இதேவேளை, நெதன்யாகுவின் தீவிர வலதுசாரிக் கூட்டணிக் கட்சிகளைச் சேர்ந்த தேசிய பாதுகாப்பு அமைச்சர் இதாமர் பென்-க்விர் உள்ளிட்டோர், அரபுக் கட்சித் தலைவர்களை உடனடியாகக் கைது செய்து விசாரணைக்கு உட்படுத்த வேண்டும் எனக் கோரிக்கை விடுத்துள்ளனர்.