மாலியில் இராணுவத் தளத் தாக்குதல் – இராணுவ வீரர்கள் மீது விசாரணை தீவிரம்

மாலி (Mali) நாட்டில் கடந்த வாரம் பல இராணுவத் தளங்கள் மீது ஒரே நேரத்தில் நடத்தப்பட்ட தாக்குதல்களில் தொடர்புடையதாக

சந்தேகிக்கப்படும் இராணுவ வீரர்கள் குறித்து அதிகாரிகள் விசாரணை நடத்தி வருகின்றனர்.

இந்தத் தாக்குதல்களுக்கு அல்கொய்தா (Al-Qaeda) தொடர்புடைய ஜமாத் நுஸ்ரத் அல்-இஸ்லாம் வல்-முஸ்லிமின் (JNIM) அமைப்பும், பிரிவினைவாதக் குழுக்களும் பொறுப்பேற்றுள்ளன.

தலைநகர் பமாகோ (Bamako) அருகிலுள்ள இராணுவ நீதிமன்ற அரசு வழக்கறிஞர் வெளியிட்ட அறிக்கையில், பணியில் உள்ள மூன்று இராணுவ வீரர்கள், ஓய்வுபெற்ற ஒருவர் மற்றும் தாக்குதலில் கொல்லப்பட்ட ஒரு வீரர் உட்பட ஐந்து பேர் சந்தேக நபர்களாக அடையாளம் காணப்பட்டுள்ளதாக தெரிவிக்கப்பட்டது.

“முதல் கட்ட கைது நடவடிக்கைகள் வெற்றிகரமாக மேற்கொள்ளப்பட்டுள்ளன. மேலும் தொடர்புடைய குற்றவாளிகள் மற்றும் உடந்தையாளர்கள் தீவிரமாக தேடப்பட்டு வருகின்றனர்,” என்று அதிகாரிகள் தெரிவித்தனர்.

ஏப்ரல் 25 ஆம் திகதி நடைபெற்ற இந்த ஒருங்கிணைந்த தாக்குதல், 2020 ஆம் ஆண்டு மற்றும் 2021 ஆம் ஆண்டு ஆட்சிக் கவிழ்ப்புகளுக்குப் பிறகு அதிகாரம் பிடித்துள்ள மாலியின் இராணுவ ஆட்சிக்கு பெரிய சவாலாக பார்க்கப்படுகிறது.

தாக்குதலில் பாதுகாப்பு அமைச்சர் கொலை செய்யப்பட்டதாகவும், அரசாங்கத்திற்கு ஆதரவாக செயல்பட்ட ரஷ்ய படைகள் வடக்கு நகரமான கிடால் (Kidal) பகுதியில் இருந்து வெளியேற்றப்பட்டதாகவும் தகவல்கள் வெளியாகியுள்ளன.

இந்த வன்முறை, மாலியின் வடக்கு பாலைவனப் பகுதிகளில் மோதல்களை அதிகரித்துள்ளதுடன், அண்டை நாடுகளுக்கும் அச்சுறுத்தலை ஏற்படுத்தும் சூழ்நிலையை உருவாக்கியுள்ளது.

மேலும், ஜே.என்.ஐ.எம் (JNIM) அமைப்பு மாலி மக்களை அரசாங்கத்திற்கு எதிராக எழுந்து, இஸ்லாமிய சட்டத்தை ஏற்குமாறு அழைப்பு விடுத்துள்ளது.

பமாகோவை முற்றுகையிடுவதாகவும், நகரைச் சுற்றி சோதனைச் சாவடிகள் அமைத்துள்ளதாகவும் பாதுகாப்பு வட்டாரங்கள் தெரிவித்துள்ளன.