போராட்டத்தில் குதித்தது CJP : பிரதமர் மோடிக்கு மீண்டும் அரசியல் நெருக்கடி

இந்தியாவில் சர்ச்சைக்குரிய வாக்காளர் பட்டியல் திருத்தத்திற்கு எதிர்ப்பு தெரிவித்து, தலைமைத் தேர்தல் ஆணையாளரின் ராஜினாமாவை வலியுறுத்தி ‘கரப்பான் பூச்சி மக்கள் கட்சி ‘ (CJP) மற்றும் அமைப்புகள் தலைமையில் ஆயிரக்கணக்கான மக்கள் வீதிகளில் இறங்கிப் போராட்டத்தில் ஈடுபட்டுள்ளதால், இந்தியப் பிரதமருக்கு மீண்டும் அரசியல் அழுத்தம் அதிகரித்துள்ளது.

கடந்த மே மாதம் ஒரு இணையவழி நையாண்டி இயக்கமாகத் (Satirical online movement) தொடங்கப்பட்ட ‘கரப்பான் பூச்சி மக்கள் கட்சி’ (CJP), முன்னதாக நடத்திய நாடு தழுவிய போராட்டத்தால் கல்வி அமைச்சர் தனது பதவியை ராஜினாமா செய்ய நேரிட்டது.

இந்நிலையில், ஜூலை மாதத்திற்குப் பிறகு அவர்களின் முதல் பெரிய போராட்டமாக மும்பையின் சிவாஜி பூங்காவில் CJP ஆதரவாளர்கள் திரண்டு பேரணி நடத்தினர்.

இதனிடையே, டெல்லியின் மையப்பகுதியில் உள்ள அரசால் அங்கீகரிக்கப்பட்ட போராட்டக் களமான ‘ஜந்தர் மந்தர்’ பகுதியைச் சுற்றியுள்ள சாலைகளில் நூற்றுக்கணக்கான மக்கள் திரண்டனர். அப்பகுதி பொலிஸ் தடுப்புகளால் முழுமையாக மூடி சீல் வைக்கப்பட்டது.

டெல்லியில் போராட்டத்தில் ஈடுபட்ட பலரை பொலிஸார் கைது செய்து, பேருந்துகளில் ஏற்றிச் சென்று வேறு இடங்களில் இறக்கிவிட்டனர். எனினும், அவர்களில் சிலர் மீண்டும் நடந்தே ஜந்தர் மந்தர் பகுதிக்குத் திரும்பினர்.

அத்துடன், தேர்தல் ஆணையாளரின் ராஜினாமாவை வலியுறுத்தி ஜந்தர் மந்தரில் வெள்ளிக்கிழமை கூட முயன்ற மாணவர் மற்றும் சிவில் சமூக அமைப்புகளை பொலிஸார் தடுத்து நிறுத்தினர்.

அப்பகுதியை நோக்கிச் சென்ற எதிர்க்கட்சித் தலைவர்கள் சிலரை பொலிஸார் கைது செய்ததுடன், அப் பகுதியில் தற்காலிகமாக மொபைல் இணைய சேவைகளும் இடைநிறுத்தப்பட்டன.

நாடு முழுவதும் மீண்டும் ஒரு புதிய போராட்ட அலையைத் தொடங்குவதையே இந்தப் பேரணிகள் நோக்கமாகக் கொண்டுள்ளன.

கல்வி அமைச்சருக்கு எதிரான முந்தைய “கரப்பான் பூச்சி” போராட்ட இயக்கத்திலும் பங்கேற்ற சமூக ஆர்வலர் விஜேதா தஹியா கூறுகையில்,

“யாரும் வேண்டுமென்றே போராட்டம் நடத்த விரும்புவதில்லை; அரசாங்கம் தவறுகளைச் செய்யும்போது தங்களது குரலை உயர்த்த வேண்டிய கட்டாயத்திற்கு மக்கள் தள்ளப்படுகிறார்கள். நாட்டின் எந்தப் பகுதியிலும் போராடுங்கள், இது வாக்களிக்கும் உரிமை சார்ந்த முக்கியப் பிரச்சினையாகும்” எனத் தெரிவித்தார்.

தலைமைத் தேர்தல் ஆணையாளரைப் பதவியிலிருந்து நீக்குவதற்கு நாடாளுமன்ற குற்றப் பிரேரணை Impeachment மட்டுமே ஒரே வழியாகும் என்றும், ஆனால் எதிர்க்கட்சிகளுக்குப் போதிய எம்பி பலம் இல்லாததால் அது சாத்தியமில்லை என்றும் அரசியல் ஆய்வாளர் வர்மா தெரிவித்துள்ளார்.

இருப்பினும், இந்த சாத்தியக்கூறை முற்றிலுமாக நிராகரித்துவிட முடியாது. ஏனெனில், நடப்பாண்டின் தொடக்கத்தில் வேலைவாய்ப்பின்மை மற்றும் தேர்வு வினாத்தாள் கசிவு விவகாரத்தில் CJP முன்னெடுத்த தீவிரப் போராட்டங்களே, பிரதமர் நரேந்திர மோடியின் அரசாங்கத்திற்கு மிகப்பெரிய அரசியல் பின்னடைவை ஏற்படுத்தி, இந்தியக் கல்வி அமைச்சரின் ராஜினாமாவுக்கு வழிவகுத்தன.

அபிஜீத் திப்கே (Abhijeet Dipke) என்பவரால் தலைமை தாங்கப்படும் CJP, இளைஞர்களை மையமாகக் கொண்டு உருவெடுத்து, தற்போது எதிர்பாராத ஒரு சக்திவாய்ந்த அரசியல் சக்தியாக மாறியுள்ளது.

கல்வி மற்றும் வேலைவாய்ப்பு என்பது அனைத்து இளைஞர்களையும் ஒன்றிணைக்கும் ஒரு “உணர்ச்சிப்பூர்வமான” விஷயமாக இருந்தது. ஆனால், வாக்காளர் பட்டியல் திருத்த விவகாரமும் அதே அளவிலான தாக்கத்தை ஏற்படுத்துமா என்பதில் சந்தேகம் இருப்பதாக வர்மா குறிப்பிட்டார்.

“இந்த இயக்கத்தால் அல்லது அமைப்பால் மீண்டும் மீண்டும் மக்களை இவ்வாறு பெருந்திரளாகத் திரட்ட முடியுமா என்பதை இந்தச் சமயத்தில் உறுதியாகக் கூறுவது கடினம்” என்றும் அவர் மேலும் தெரிவித்தார்.