இலங்கையை உலுக்கிய கோர விபத்து: மூவர் பலி – நால்வர் காயம்

கேகாலை மாவட்டம், வரக்காபொல பகுதியில் இன்று (07) மாலை இடம்பெற்ற கோர வாகன விபத்தில் மூவர் உயிரிழந்துள்ளதுடன், நால்வர் காயமடைந்துள்ளனர்.

உயிரிழந்தவர்களில் இரு ஆண்களும் ஒரு பெண்ணும் அடங்குவதாக வைத்தியசாலை வட்டாரத் தகவல்கள் தெரிவிக்கின்றன.

கொழும்பு – கண்டி பிரதான வீதியில் இந்த விபத்து இடம்பெற்றுள்ளது.

கொழும்பில் இருந்து கண்டி நோக்கிப் பயணித்த வேன் ஒன்று, மற்றுமொரு வாகனத்தை முந்திச் செல்ல முற்பட்டபோது, எதிர்திசையில் வந்த இலங்கை போக்குவரத்துச் சபைக்குச் சொந்தமான பேருந்துடன் மோதியதில் இந்த விபத்து நேர்ந்துள்ளது.

விபத்தில் காயமடைந்தவர்கள் வைத்தியசாலையில் அனுமதிக்கப்பட்டுள்ளனர்.

சம்பவம் தொடர்பான மேலதிக விசாரணைகளை பொலிஸார் முன்னெடுத்து வருகின்றனர்.